اسلام آباد۔ 28جون (اے پی پی) قومی اسمبلی وزارت حوالکاری و شینکاری نا 10ارب 7کروڑ 40لکھ 57ہزار روپئی نا 3مطالبات زر انا منظوری ءِ تس وخت اس کہ اپوزیشن نا کنڈآن پیش کروک 107کٹوتی نا تحریک آتے گیشتری سلاہ اٹ مستردکرے۔ دوشنبے نادے آ قومی اسمبلی ٹی وزیر خزانہ شوکت ترین شعبہ حوالکاری و شینکاری نا 30جون 2022ء آ چٹوک آ مالی سال انا خڑچ آتے پورو کننگ کن 2ارب 75کروڑ 50لکھ روپئی نا مطالبہ زر پیش کرے۔ داڑآ اپوزیشن نا کنڈآن کٹوتی نا 95تحریک پیش کننگا۔ شوکت ترین متفرق خڑچ آتے پورو کننگ کن 6ارب 41کروڑ 70لکھ روپئی نا مطالبہ زر پیش کرے۔ داڑآ اپوزیشن نا کنڈآن کٹوتی نا 6تحریک پیش کننگا۔ شوکت ترین وزارت نا شونداری خڑچ آتے پورو کننگ کن 90کروڑ 20لکھ روپئی آن زیات نا مطالبہ زر پیش کرے ہراڑآ اپوزیشن نا کنڈآن کٹوتی نا 6تحریک پیش کننگا۔ اوکان پد وزارت حوالکاری و شینکاری نا مطالبات زر آ کٹوتی نا تحریک آتیا شرہ مس و وزیر حوالکاری و شینکاری شرہ ءِ چٹفے۔ اوکان پد ڈپٹی اسپیکر کٹوتی نا تحریک آتے ایوان اٹ پیش کرے ہرافتے گیشتری سلاہ اٹ مسترد کننگا و مطالبات زرانا ایوان منظوری ءِ تس۔
