اسلام آباد۔ 28جون (اے پی پی) وزیرخارجہ مخدوم شاہ محمود قریشی پارے کہ بھارت، ایف اے ٹی ایف ءِ سیاسی مسخت آتے کن کاریم اٹ اتنگ ءِ، فیٹف نا باندات آتے ایسر کننگ کن انتس کرین اوملکی فائدہ ٹی کرین۔ آخبت ہم ہرافیصلہ ءِ کینہ اودے ملکی فائدہ غاتے مون آ تخسا کینہ، امریکہ ءِ اڈہ تننگ آن انکارءِ نن ملکی مفاد اٹی کرین۔ اگست نا اولیکو ہفتہ ٹی سویلی پنجاب سیکرٹریٹ نا عملی وڑاٹ کاریم بناکیک۔ دوشننبے نادے آ ایف اے ٹی ایف، اوغانستان نا حالیت و سویلی پنجاب سیکرٹریٹ نا بابت اسہ بیان اسے ٹی وزیرخارجہ پارے کہ ای ایف اے ٹی ایف نا بابت تینا موقف ءِ مچ آ قوم انا مون آ پیش کرینٹ و چندی ملک آتا وزیرخارجہ غاتون ہڑتوم آ کنڈآتا گپ وتران اٹی، دابابت گپ وتران کرینٹ، و اوفتے تینا گڑتی آن معلومدار کرینٹ۔ وزیرخارجہ پارے کہ ہندوستان، ایف اے ٹی ایف ءِ سیاسی مسخت آتے کن کاریم اٹ اتنگ ءِ، ایف اے ٹی ایف اسہ تیکنیکی ءُ فورم اسے اودے بایدے سیاستی مسخت آتے کن کاریم اٹ اتنگپ۔ اگہ ایف اے ٹی ایف نا مسخت، منی لانڈرنگ و ٹیرر فنانسنگ ءِ توننگ نا ءِ تو ننا ہم ہند اہدف ءِ۔ نن تینا فائدہ غاتا رداٹ، منی لانڈرنگ و دہشت گردی نا مالی کمکاری ءِ توننگ کن مون آ برسا کانہ۔ فیٹف و ننا سوچ اسٹ ءِ اوتینا وڑاٹ کاریم کننگ ءِ و نن تینا مسخت آتا رداٹ اوڑآ عملدرآمد کننگ اُن۔ شاہ محمود قریشی پارے کہ تدوک آ اِراسال اٹی، ننے ایف اے ٹی ایف نا کنڈآن ہراپروگرام تے تننگا اوڑآ عملدرآمد بھاز مشکل ئس ولے نن کرین، نن چانڑدہ کانود اٹی ترمیم کرین و پوسکن کانود سازی کرین، انتظامی وڑنا گام گیج کرین و زموار آتا نئے بیرہ پیدواری ءِ کرین بلکن اوفتا برخلاف کارروائی ہم کرین وخت اس کہ پاکستان نا عدلیہ و انتظامیہ تینا تینا کڑد ءِ ادا کننگ ءُ۔ شاہ محمودقریشی پارے کہ ننا مقننہ تینازموارانہ کڑد ءِ ادا کرینے۔ ہراتسکان سفارتی کوشست آتا تعلق ءِ، داویل آ چین، سعودی عرب، ملائیشیا، انڈونیشیا وخلیجی ملک آک پاش آن پاش ننتون تفیر، مخدوم شاہ محمود قریشی پیدوار کرے کہ نن فیٹف نا باندات آتے ایسرکننگ کن انتس کہ کرین اوفتے ملکی مفاد اٹی کرین۔ شاہ محمود قریشی پارے کہ انخلانا فیصلہ کننگ آن پد ہم امریکی حکومت اودے مالی کمکاری ءِ برجاتخنگ نا باورکرفے، ہراتسکان امن نا تعلق ءِ تو اونا فیصلہ ءِ اوغان تے اواری اٹ تولسا کروئی ءِ۔ دافیصلہ ءِ اوغان تے کروئی ءِ کہ ہموڑے ہراوڑنا کانود مرے، ہراسٹ ءِ ہرا واکداری دوئی مریک، ہراناہراحق مریک وخت اس کہ پاکستان بطور ہمسایہ، امن کن دعاہم کننگ ءِ و کمک ہم ہراممکن مس نن کرسا کینہ۔
