لاہور۔ 28جون (اے پی پی) گورنرپنجاب چوہدری محمد سرور پارینے کہ انشاء اللہ آزاد کشمیر نا صدر و وزیراعظم پاکستان تحریک انصاف آن ہی مریک و آزاد کشمیراٹی گلگت بلتستان گچین کاری کون آ شکست مخالفین آتا مقدر مریک، روشن ڈیجیٹل اکاؤنٹ اٹ 1.5ارب ڈالرز نا زرکاری حکومتی پالیسی تیا پت انا درشانی ءِ، اپوزیشن نا اخس کہ مرضی ءِ اڑنگ شاغے حکومت اوورسیز پاکستانی تے وونٹ انا حق تننگ نا قول ءِ ضرور پورو کیک۔ گورنر ہاؤس اٹی تحریک انصاف نا مرکزی باسک شوکت بسرا و آزاد کشمیرتون اوڑدہی کروک آ تحریک انصاف نا کارندہ غاتا ڈل اتون گپ وتران کرسا اوپارے کہ وزیراعظم عمران خان بیرہ کشمیری تا آخا فلسطینی تاہم سفیر مرسا اوفتا آجوئی نا مقدمہ تون مون تننگ ءِ، آزاد کشمیر نا شونداری و شونہالی کن بنجائی حکومت غٹ وسیلہ فراوان کننگ ءِ و ملکی تاریخ اٹ اولیکو وار پاکستان اٹ اسہ وڑشونداری کن گام گیج کننگ انگ ءِ و اینو پاکستان زرگزرانی تون اوار ہربشخ اٹی سرسہبی اٹ مون آ ہِننگ ءِ۔ اوپارے کہ وزیراعظم عمران خان نا کماشی ٹی حکومت الس تون کروک آ غٹ قول آتے پورو کیک۔ الس ملک ءِ نزوری نا گواچی کروک آتون تفپک حکومتی بیانیہ تون سلوک ءُ۔ بنجائی و صوبائی حکومت الس دوست بجٹ تسنو، بنجائی بجٹ ہم منظور مریک، وزیراعظم عمران خان آئین و کانود نا حکمرانی آ یخین تخک ہراڑآن پدی مفنہ، ملک اٹ ادارہ غاتے ٹی اصلاحات کن ساڑی حکومت عملی گام گیج کننگ ءِ۔ گورنر پنجاب پارے کہ اپوزیشن آزاد کشمیرنا گچین کاری تیٹی سرسہبی نا تغ ءِ ہُننگ ءِ ہلے انتئے کہ اپوزیشن ءِ ہراوڑگلگت بلتستان نا گچین کاری تیٹی شکست مسنے ہمووڑ شکست اوفتے آزاد کشمیرنا لس گچین کاری تیٹی مریک و الس نا فیصلہ پاکستان تحریک انصاف نا حق اٹی بریک۔ گورنر پنجاب پارے کہ اپوزیشن آن اوورسیزپاکستانی تے وونٹ انا حق تننگ نا حکومتی فیصلہ برداشت مفننگ ءِ ہنداخاطرآن اواڑنگ شاغنگ نا کوشست کننگ ءُ ولے اپوزیشن نا اخس کہ مرضی ءِ اڑنگ شاغے اوورسیز پاکستانی تے وونٹ انا حق ایتنہ۔ شوکت بسرا پارے کہ اپوزیشن قوم ءِ ریفنگ نا کوشست کننگ ءِ ولے بے سہب مریک، انشاء اللہ وزیراعظم عمران خان نا کماشی ٹی حکومتی آئینی مد ءِ پورو کیک۔
