اسلام آباد۔ 28جون (اے پی پی) روشن ڈیجیٹل اکاؤنٹ نا سرسہبی سمندر آن ایپار پاکستانی تا کنڈآن وزیراعظم عمران خان آ پت انا درشانی ءِ۔ سمندر آن ایپار پاکستانیک دااکاؤنٹ نا کمک اٹ نئے بیرہ پیسہ مون تننگ ءُ بلکن زرکاری کروک آ پاکستانی تے گچین کٹیاہم ملنگ ءِ۔ روشن ڈیجیٹل اکاؤنٹ نا کمک اٹ 170ملک آتیان اکاؤنٹ ملنگانے، اسکیم سمندر آن ایپار پاکستانی تے ملک اتون گنڈانے، روشن ڈیجیٹل اکاؤنٹ آ ہچ ءُ خراج اس خلوک اف، پوسکن آ پاکستان سرٹیفکیٹ آتا کٹیا غا 10درسد خراج ءِ ولے ریٹرن فائل کننگ نا ضرورت مفک۔ روشن ڈیجیٹل اکاؤنٹس سمندرآن ایپار پاکستانی تیٹی ملک اٹ آسانی و آسودہی اٹ زرکاری نا موقع فراوان کرے۔ داخیال آتا درشانی ءِ ترانکارآک دوشنبے نادے آ حکومت پاکستان، اسٹیٹ بینک و اے کے ڈی سیکورٹیزنا کنڈآن ”پاکستان نا اقتصادی لینڈ سکیپ۔روشن ڈیجیٹل اکاؤنٹ۔پوسکن آ پاکستان نا کنڈآ سفر“ نا سرحال آ ویبنار آن تران کرسا کریر۔ لاس اینجلس اٹ پاکستان نا قونصلر جنرل عبدالجبار میمن پارے کہ سمندر آن ایپارپاکستانیک ملک انا نہادی میرات ءُ، برجامالی سال اٹی سمندرآن ایپار پاکستانیک زررادہ کننگ نا دروشم اٹ 28ارب ڈالر ملک آ مون تسر ہرانئے بیرہ جی ڈی پی نا8درسد ءِ بلکن دا ملک انا برآمدآتیاہم زیات ءِ۔ داڑآن حکومت ءِ حسابات جاریہ نا کھاتہ غاتا نسخان ءِ کم کننگ اٹ کمک رسینگانے۔ اوپارے کہ روشن ڈیجیٹل اکاؤنٹ حکومت و اسٹیٹ بینک انا اہم ءُ ڈٹ اسے۔ داتم اسکان یک و نیم لکھ آن زیات اکاؤنٹ ملنگانے و داٹی پین ودکی مننگ ءِ، دااسہ بھلو سرسہبی اس و سمندر آن ایپار پاکستانی تیکن آسراتی اسے۔ اوپارے کہ حکومت خواری اٹ پاکستانی مشن و کمرشل بینک آتون اواری اٹ دادے سرسہب کرے۔ پاکستان نا ڈپٹی قونصلر جنرل شاہراز عاصم پارے کہ روشن ڈیجیٹل اکاؤنٹ ہندن ءُ اسکیم اسے ہرانا مستین اٹ درور ملیپک۔ اوپارے کہ سمندرآن ایپار پاکستانی تے داہیت ءِ پہہ مننگ نا گرج ءِ کہ مالیاتی تنکی امریکہ کون آ ملک آتے ٹی ہم بریک۔ اوپارے کہ روشن ڈیجیٹل اکاؤنٹ سمندرآن ایپار پاکستانی تے اسہ بھاز بھلو آسودہی اس تسنے۔ سمندرآن ایپارپاکستانیک داناکمک اٹ نئے بیرہ پیسہ مون تننگ ءُ بلکن زرکاری کروک آ پاکستانی تے گچین کٹیا ہم ملنگ ءِ۔ سمندرآن ایپارپاکستانی تے زرکاری آ تینا چکار ءِ کننگ نا گرج ءِ۔ اے کے ڈی گروپ نا سی ای او عقیل کریم ڈھیڈی ویبناراٹ پارے کہ سمندرآن ایپار پاکستانیک مدام وزیراعظم عمران خان آ پت انا درشانی ءِ کرینے۔ اوپارے کہ سمندرآن ایپار پاکستانیک داسہ ایکویٹی و ہاؤسنگ نا بشخ اٹی ہم زرکاری کننگ کیرہ۔ روشن ڈیجیٹل اکاؤنٹ اوورسیز پاکستانی تیکن جوان ءُ موقع اسے۔ اوپارے کہ زرگزران نا چندی بشخ آتے ٹی ہراودکی مسنے او بے مٹ ءِ، اولیکو وار ہندی صنعت، کشت وکشارآٹو۔ٹیکسٹائل، آئی ٹی و ہاؤسنگ نا بشخ اکن پالیسی و آسراتی تننگا ہرانا سوب آن اینخو سال ننا جی ڈی پی نا ودکی نا کچ 4درسد نا خڑک مریک۔ اوپارے کہ وزیراعظم عمران خان ہاؤسنگ نا بشخ ءِ ہرااہمیت ءِ تسنے اونا درور ملیپک، ہاؤسنگ نا بشخ اکن وزیراعظم عمران خان 80آن زیات دیوان آتے ٹی تینٹ بشخ ہلک۔ اوپارے کہ پوسکن آ پاکستان سرٹیفکیٹ آتے ٹی زرکاری مننگ ءِ ولے ایکویٹی و ایلو بشخ آتے ٹی داخہ در زرکاری متنے۔ پوسکن آ مالی سال انا بجٹ اٹ اسٹاک ایکسچینج اٹ لسٹنگ اٹ آسراتی تننگانے و اڑنگ آتے چٹفنگانے۔ ایکویٹی مارکیٹ اٹ کٹیائی 10آن ہلیس 20درسد اسکان سرمننگ کیک ہرادنیاٹی جاگہ اس ہم اف۔ پاکستان نا زرگزران ودکی نا کنڈآہِننگ ءِ، پاکستان اٹ کم خڑچ اُراتا تفنگ کن 72سال آتے ٹی اولیکو وار کاریم مسنے، کیہی ڈٹ بننگ ءِ ہرافتا اثر بروک آ 25سال آتے ٹی مریک انتئے کہ اِراکروڑ ہند آتا گرج مریک۔ اوپارے کہ ساڑی حکومت نا دوراٹی اولیکو وار ہند آتا تفنگ آمارگیج نا آسراتی ءِ تننگانے۔
