اقوام متحدہ۔26جون (اے پی پی): یونائیٹڈ نیشن ءَ پاکستان ءِ نماھندگ سفیر منیر اکرم ءَ گوشت کہ پاکستان ءَ ناشرکاری ءِ ھلاسی ھاسیں رنگ ءَ ناشرکاری ءِ مالی کمک کنوک آنی ھلاپ ءَ مھکمیں ءُ جوانیں گامگیج کتگ۔ ناشرکاری ءِ مالی کمک آنی ھلاسی ءِ ھوالگ ءَ یونائیٹڈ نیشن ءِ یک مزن تکی پینل ءَ گوں گشتانک دیان ءَ آئی ءَ گوشت کہ پاکستان ءَ ناشرکاری ءِ ھلاسی ءِ واستہ کانود ءِ جوڑیشت، ادارگ ءُ گہتری ءُ آپریشنل گامگیج کتگ انت۔ آئی ءَ گوشت کہ ناشرکاری استیں دور ءَ یک لعنت ات ایشی ءِ ھلاسی ءِ واستہ ناشرکار آنی مالی کمک کنوک آنی ھلاپ ءَ کاروائی ءَ ھوار ٹوھیں گامگیج ءِ ضلورت انت۔ آئی ءَ گوشت کہ اے لعنت ءِ ھلاسی ءِ واستہ ھما ایندگر گامگیج ءِ ضلورت انت ایشانی تہ ءَ ناشرکار آنی مالی کمک کنوک آناؐں گر ءُ دار کنگ ءُ اے ھوالگ ءَ سیادی داروکیں ملک آنی کار رپک ءَ گیشی کنگ ھوار انت۔ منیر اکرم ءَ گوشت کہ ناشرکار آنی مالی کمک آنی ھوالگ ءَ گامگیج آنی چار ءُ تپاس گرگ ءِ ضلورت انت اے میاں اوستمانی کانود ھاسیں رنگ ءَ ھاسیں بنی آدمی ھک ءُ میاں اوستمانی بنی آدمی ھک آںی کانود ءِ رد ءَ نہ انت، ایشی ءَ ابید ناشرکاری ءِ بنیاتی جیڈھ آنی گیوری کنگ ھم ضلوری انت۔ ایشانی تہ ءَ بنی آدمی ھک، ناشرکارانی مالی کمک ءُ ریاستی ناشرکاری ، اسلامو فوبیا ءُ سیاسی ایجنڈا آنی رد ءَ سی ایف ٹی ءِ ردئیں کارمردی وڑیں ایشوز آناں گیوار کنگ ءِ ضلورت انت۔
