اسلام آباد۔26جون (اے پی پی): مزن وزیر عمرنا خان ء۔ گوشت کہ ناکامی ءَ چہ ترسوک اچبر باج برت نہ کنت، ورنا مئے آیوکیں باندات انت، اللہ تعالیٰ ءَ مارا ھمک رنگیں جیڈھ، موسم ءُ نعمت آنی داد داتگ، مارا دومیگ آنی گیگان ءِ کنگ ءِ مٹ ءَ وتی کشک در چنگی انت، سیل ءُ سواد ءِ شوبگ ءَ چہ انوگ ءَ تاں سرجمیں رنگ ءَ سیت چست کنگ نہ بوتگ، ایشی ءِ اندر ءَ بازیں موہ است انت، پاکستان سیل ءُ سواد ءِ دیمروئی ءَ باز پیسہ کمائنتگ بوت کنت۔ اے ھیالانی درشانی آئی ءَ شمبے ءِ روچ ءَ امیچور شارٹ فلم سیسٹیول ءِ مراگش ءَ گشتانک دیان ءَ کت۔ مزن وزیر عمران خان ءَ آئی ایس پی آر ءَ را اے فیسٹیول ءِ برجائی ءَ توسیپ ءُ ستا پیش کنان ءَ اے یک نوکیں بندات ات، ادا ورنا آنی جوڑ کتگیں لُکوکیں تامر آناں چارگ ءَ چہ باز دل وشی بوتگ، نوں ما راستیں کشک ءَ رھادگ آں۔ آءی ءَ بنجاھی وزیر اھوالکاری ءُ شنگ کاری چوہدری فواد حسین ءَ توسیپ ءُ ستا پیش کت ءُ گوشت کہ آ نوکیں سسا ءِ در جنان ءَ اتکگ۔ آئی ءَ سکالر شپ در جنوکیں ورنا آناں مبارک بات دیان ءَ گوشت کہ لُکوکیں کساس ءِ تامر ءِ دیمروئی ءِ واستہ ورنا آناں وظیفہ دیگ بیت۔
