اسلام آباد۔ 25جون (اے پی پی) کینیڈاٹی تعینات پاکستانی ہائی کمشنر رضابشیر تارڑ پارینے کہ روشن ڈیجیٹل اکاؤنٹس پیشن نا ملک رہینگوک آ پاکستانی تے قومی زرگزران اٹ کڑد ادا کننگ نا موقع فراوان کرینے۔ جمعہ نادے آ ویبنار آن تران اٹی ہائی کمشنر رضابشیر روشن ڈیجیٹل اکاؤنٹس ءِ حکومت پاکستان نا اسہ مزل نا کوشست اس گوندانے ہرانا سوب آن پیشن نا ملک رہینگوک آ پاکستانی تے ملک انا زرگزران اٹ زرکاری کننگ و راجی و زرگزرانی شونداری ٹی شریک مننگ نا موقع ملانے۔ اوپیشن نا ملک پاکستانی تے آرڈی اے اسکیم نا کمک اٹ ہڑدے ئی و لائف اسٹائل بینکنگ و پاکستان نا ترندی اٹ ودوک آ زرگزران اٹ زرکاری کننگ نا وارخواہی و فائدہ غاتیان معلومدار کرے۔ ہائی کمشنر پارے کہ تدوک آ سال ستمبر اٹی لانچ کننگ آن پد آن روشن ڈیجیٹل اکاؤنٹس نا مقبولیت اٹ بے حد ودکی مسنے و داتم اسکان اسہ لکھ شست ءُ پنچ ہزار پیشن نا ملک پاکستانیک دااسکیم اٹ بشخ ہلسا لگ بھگ یک و نیم ارب ڈالر نا بھلو زر اسے نا پاکستان نا مالیاتی و زرگزرانی نظام اٹ زرکاری کرینو۔ رضابشیر تارڑ پارے کہ وزیراعظم پاکستان عمران خان اولیکو دے آن پیشن نا ملک رہینگوک آ پاکستانی تا اہمیت و قومی زرگزران اٹ اوفتا کڑد انا ستاءِ کرینے و پاکستان نا زرگزرانی شونداری ٹی زرمون تننگ نا اہم کڑد آ پیشن نا ملک پاکستانی تے مدام قدر وتحسین نا نظراٹ ہرانے۔ اوپارے کہ پیشن نا ملک پاکستانی سوب آن پاکستان مچ آ ملک اٹی ترسیلات زر وصول کروک آ بھلا ملک آتا لڑاٹ شش میکو نمبر آ بسنے وخت اس کہ روشن ڈیجیٹل اکاؤنٹس نا بناآن پیشن نا ملک رہینگوک آلگ بھگ نود لکھ پاکستانی تے لمہ وطن نا شونداری و کامرانی ٹی پین گچین وڑاٹ بشخ ہلنگ اٹ کمک رسینگک۔ اوپارے کہ داتم اسکان روشن ڈیجیٹل اکاؤنٹس اٹی پیشن نا ملک پاکستانی تا است خواہی و بھلو کچ اسے ٹی اکاؤنٹ ملفنگ و او اکاؤنٹ آتے ٹی بھلو زر اس جمع کرفنگ آن بیدس پوسکن آ پاکستان سرٹیفکیٹ آتے ٹی ہفتاد ءُ ہفت کروڑ ڈالر نا زرکاری آن اوفتا حکومت نا زرگزرانی پالیسی تیا پت انا ڈیک مریک۔ اوروشن ڈیجیٹل اسکیم نا سرسہب بنا و دااسکیم اٹ روشن تینا کار اسکیم و روشن راجی خذمت کون آ پوسکن ءُ مصنوعات درستی راستی کرفنگ آ اسٹیٹ بینک آف پاکستان و ایلو قومی بینک آتا ستاءِ کرے۔ ویبی نار آن بوسٹن اٹ پاکستان نا اعزازی قونصل جنرل شاہداحمد خان، دوبئی اسلامک بینک پاکستان نا صدر و سی ای او جنید احمد، ٹی سی ایف کینیڈانا صدر ساجد سلمان، کنٹری ہیڈاے سی سی اے سلیم اسلم و ایلوفک تران کریر۔
