اسلام آباد۔ 25جون (اے پی پی) وزیرخزانہ شوکت ترین پارینے کہ پاکستان تحریک انصاف نا حکومت راج انا غٹ تپہ غاتے کن اومیت نا بجٹ اس تسنے، کورونا نا دین انا مشکل آتیان پد ہم عمران خان دلیری اٹ مشکل ءُ فیصلہ کرے ہرانا سوب آن ننا شرح نمو 4 درسد اسکان بسنے، پین وخت اسے کن ہم پائیدار شرح نمو نا بھرم تے شیفکو تپہ اسکان سرکننگ کن گچین گام گیج کننگانے، صنعت، کشت وکشارخاص وڑاٹ برآمدآتون وابستہ صنعت آتا شونداری کن گام گیج آتیان ملک شون ہلیک، موبائل فون نا 5منٹ آن زیات کال آ 0.75پیسہ خراج ہلنگک، 12وڑنا ودہولڈنگ خراج آتے چٹفنگانے، تھرڈ پارٹی آڈٹ نا کمک اٹ عادی خراج دزآتا پیدواری ءِ کرسا باقاعدہ اسہ وڑوڈول اسے نا رداٹ اوفتے دزگیر کننگ مریک، پال، نت و اونا مصنوعات آتیا خراج ءِ چٹفنگانے، 850سی سی گاڈی آ خراج ءِ کم کننگ نا فیصلہ کننگاسس داسہ دا فیصلہ 1000سی سی آ لاگو مریک، جان جوڑی نا بشخ ءِ خراج آن مستثنیٰ گوندنگانے، آئی ٹی نا بشخ ءِ خراج آن استثنیٰ مریک، بروک آ اِرامسہ سال اٹی ننا آئی ٹی نا ایکسپورٹس 6آن 8ارب ڈالر گمانی ءِ۔ 2022ء اسکان دہ کروڑ بندغ ءِ ویکسین خلنگ نا ہدف مقرر کننگانے۔ جمعہ نادے آ قومی اسمبلی ٹی بنجائی بجٹ 2021-22آ شرہ ءِ چٹفسا وزیرخزانہ شوکت ترین پارے کہ پی ٹی آئی نا حکومت ہراتم برسراقتدار بس تو غٹ آن بھلا ویل 20ارب ڈالر نا کرنٹ اکاؤنٹ نسخان ئس و داکان بیدس 10آن 11ارب ڈالر نا گونڈ مدتی وام ئسر۔ اوپارے کہ مستین اٹ شرح نمو و خراج ٹوجی ڈی پی گروتھ وام ہلسا نشان تننگاسس، 2008ء ٹی وامک 6ٹرین روپئی ئسر، ہرا 2018یعنی مسلم لیگ (ن) نا حکومت نا ایسر آ ودسا 30ٹرین روپئی مسر۔ 2018ء ٹی کرنٹ اکاؤنٹ نسخان 20ارب ڈالر ئس وخت اس کہ 8ارب ڈالر نا گونڈمدتی پیشن نا وام تے دمدستی پدی تروئی ئسک۔ داکل28ارب ڈالر نا گیپ و بھلو ویل اس ئسر ہرانا سوب آن پاکستان تحریک انصاف تون آئی ایم ایف آ ہِننگ آن بیدس ہچ ءُ چارہ اس الوکہ۔ آئی ایم ایف سخت ءُ شڑت تخا ہرافتے ٹی ڈسکاؤنٹ سواسینزدہ درسد کننگا۔ ایکسچینج ریٹ ءِ 169روپئی فی ڈالر آ سرکننگا۔ اوپارے کہ گیس و بجلی نا ٹیرف ءِ ہم ودفنگا، آئی ایم ایف درآمد آتیا زور ءِ چٹفنگ خواہسکہ۔ 2018-19ء ٹی ننا شرح نمو اِرادرسد آ بس۔ عمران خان دلیری اٹ مشکل ءُ فیصلہ کرے۔ اوپارے کہ ایلو کورونا نا دین تالان مس۔ ہرانا اولیکو، ارٹ میکو و مسٹ میکو ریسہ بسر۔ مچ آ مشکل آتیان پد ہم اوگچین ءُ فیصلہ کرے۔ وزیراعظم عمران خان ہاؤسنگ نا صنعت ءِ شون تننگ نا فیصلہ کرے۔ دارداٹ نن آئی ایم ایف آن آسودہی ہلکن۔ ایکسپورٹ، کشت وکشار و ہاؤسنگ سیکٹر ءِ گچین کننگا۔ مچ آ دنیاٹی کورونا دین انا سوب آن منفی گروتھ مس، ننا ہم بیرہ 0.5درسد منفی گروتھ مس ولے اللہ نا فضل اٹ عمران خان ہراگام گیج آتے کرے اوفتا مچ آ دنیا ٹی ستاءِ کننگا۔ سمارٹ لاک ڈاؤن نا فیصلہ غان نناکارخانہ غاک چلینگسا کریر و ننا شرح نمو 4 درسد اسکان بس۔ وزیر خزانہ پارے کہ ننا حکمت عملی ءِ کہ ننے شون ہلوئی ءِ و اقتصادی و زرگزرانی شرح نمو ٹی ودکی کروئی ءِ۔ داوار ہرانن شونداری ءِ کینہ او پائیدار و جامع شونداری اس مریک۔ اوپارے کہ تدوک آ 74سال اٹی حکمت عملی دائس کہ اقتصادی شونداری نا بھرمک نیزگاراسکان سرمتور، نن فیصلہ کرینن کہ نن نیزگارآتا خیال ءِ تخنہ۔ نن 40آن 60لکھ اُراتے بے سود وام تننگ نا فیصلہ کرینن۔ نن کشاری بشخ اتون وابستہ مخلوق ءِ یک و نیم و مسہ لکھ نا وام تننگ نا فیصلہ کرینن۔ ہنداوڑ شاری علاقہ غاتے ٹی مخلوق ءِ کاروبار کن 5لکھ انا بے سود وام تننگ نا فیصلہ کننگانے۔ اوپارے کہ مخلوق ءِ درمان کن جان جوڑی کارڈ تننگک، ہراُرانا ہربندغ ءِ کسب نا تربیت تننگک تانکہ او تیکن روزگاراس کننگ کے۔ اوپارے کہ بے سود وام تا بابت اخوت و این آر ایس پی تدوک آ20سال آن داکاریم ءِ کننگ ءُ، نن ہمووڑآ مخلوق ءِ وام تننگ کن گام گیج کینہ۔ اوپارے کہ اگہ ننے گروتھ ءِ ودفوئی ءِ تو کٹیا نا ذریعہ ٹی ودکی کروئی مریک۔ بروک آ سال اکن کٹیا تا 5800ہدف نن مقررکرینن، داڑکن خراج اصلاحات اتنگ اُن۔ نن خراج تروک و خراج ہلوک آتا نیام اٹ الیکٹرانک لنک ودی کروئی ءِ۔ یونیورسل اسیسمنٹ اسکیم اس درستی راستی کرفنگانے۔ اوپارے کہ تھرڈ پارٹی آڈٹ مریک، ہرافک خراج تفسہ تھرڈ پارٹی آڈٹ نا سفارش نا رداٹ داعادی خراج دزآتے باقاعدہ وڑوڈول انا رداٹ دزگیر کننگ مریک۔
