اسلام آباد۔ 25جون (اے پی پی) وزیراعظم عمران خان پارینے کہ پاکستان امریکہ تون گچین تعلقداری نا خواہندار ءِ، نائن الیون آن پد دا تعلق اسہ کنڈی ئسک، امریکہ خواہسکہ کہ پاکستان امداد نا بدلہ اونا ہیت ءِ منے، اوغانستان آن امریکہ نا پیش تمنگ نا تاریخ نا پڑو مننگ آن پدطالبان تیا ننا واکداری کم مس، طالبانک اگہ فوجی وڑاٹ کٹنگ نا کسر ءِ اختیار کریر تو بھلو خانہ جنگی اسے نا گمان مریک، ہراڑآن نن ہم زہمی مرینہ۔ کشمیرنا ویل ایسر مننگ اسکان بھارت تون مست آنبار تعلقداری بحال مننگ کپک۔ داخیال آتا درشانی ءِ او پنی آ امریکی جریدہ ”نیویارک ٹائمز“ ءِ اسہ انٹرویو اسے ٹی کرے۔ پاک امریکہ تعلقداری نا بابت سوج انا ورندی ٹی وزیراعظم پارے کہ پاکستان نا تینا ہمسایہ ملک بھارت نا مقابلہ ٹی امریکہ غان زیات خڑک تعلقداری مسنے، نائن الیون آن پد پاکستان دہشت گردی نا برخلاف جنگ اٹ امریکہ تون شمولیت اختیار کرے، داسہ وخت اس کہ امریکہ اوغانستان آن پدی ہِننگ ءِ پاکستان اسہ گچین ءُ تعلق اسے نا خواہندار ءِ، دُن کہ قوم تا نیام اٹ مریک، نن امریکہ تون تینا واپاری تعلقداری تے گچین کننگ خوانہ۔ پاک۔امریکہ تعلقداری نا بابت مستی وضاحت کرسا وزیراعظم پارے کہ پاکستان ہموتعلقداری تا خواہندار ءِ ہراوڑ کہ امریکہ و برطانیہ یا امریکہ وبھارت نا نیام اٹ داوخت آارے، نن ہندن ءُ تعلق اس خوانہ ہرابریبری نا کہول آ مرے۔ اوپارے کہ بدبختی اٹ دہشت گردی نا برخلاف جنگ اٹی دا تعلق بریبری نا الوکہ۔ امریکہ دا تکاکہ کہ او پاکستان ءِ امداد تننگ ءِ ہنداخاطرآن پاکستان ءِ امریکہ نا ہیت ءِ منوئی مریک و پاکستان امریکہ کن انتس کہ کرے اونا اودے انسانی جون تا حالیت اٹ بھلو نہاد اس تروئی تما، پاکستان دا جنگ اٹ 70ہزار جان تا قربانی تس و ملکی زرگزران ءِ داڑآن 150ارب ڈالر نا نسخان رسینگا، دہشت گردی نا برخلاف جنگ انا سوب آن خودکش جلہو و ملک اٹ جاگہ جاگہ غا بمب دھماکہ مس۔ وزیراعظم پارے کہ داکان ویل بناکرے، امریکہ پاکستان آن پین اومیت وابستہ کرسا تخا و بدبختی اٹ پاکستانی حکومت آک ہموکننگ نا کوشست کریر ہرانا او لائخی تختورہ۔ ہڑتوم آ ملک آتا نیام اٹ پت انا کمتی ئس و پاکستانی الس دا سمجھاکہ اوامریکہ تون تعلق نا بھاز بھلو نہاد اس تسنے و امریکہ داسمجھاکہ پاکستان کافی ہچ اس کتنے، ہنداخاطرآن داوڑاٹ دااسہ کنڈی تعلق ئس۔ وزیراعظم پارے کہ نن آخبت اٹ ہندن ءُ تعلق اس خوانہ ہرانا بنداو پت و اسیجائی مسخت آتیا مرے و داوخت آ ہندن ہی ارے یعنی اوغانستان اٹی ننا مسخت آک اینو اسل اسہ وڑ اٹ ءُ۔ وزیراعظم آن سوج کننگاکہ انت پاکستان نا اوغانستان آن امریکی انخلاء آن پد اوڑتون تزویراتی تعلق برجاسلک؟ نا ورندی ٹی وزیراعظم پارے کہ ای دابارواٹ ہچ پاننگ کپرہ، ای دابابت داوڑسجفتنوٹ کہ پاکستان نا امریکہ تون تزویراتی تعلق اس مرے۔ ریاست آتا نیام اٹ تعلق اسیجائی فائدہ غاتا بنداو آ مریک، پاکستان زیات تر ورناآبادی آ تالان 22کروڑ مخلوق نا مالک ءِ ہراکہ آخبت کن اسہ لحاظ اٹ تزویراتی ہنداس تخک، اگہ ننا بھارت تون تعلق ریسہ سے آ گچین مریک ہراڑکن ای پراومیت اُٹ کہ مریک ہنداخاطرآن پاکستان نا اسہ کنڈآ غٹ بھلا مارکیٹ آتیان اسہ مارکیٹ اس ساڑی ءِ و ایلو کنڈآ چین ءِ، ہنداوڑننا چارمہ کنڈ اِرابھلو منڈی واقع ءُ و ولدا توانائی راہداری ہم ساڑی ارے ہرافتیان فائدہ ہرفنگ مریک، ہنداوڑ پاکستان اقتصادی لحاظ اٹ آخبت اٹ اہم تزویراتی ہند اس تخک۔ وزیراعظم پاکستان و امریکہ نا نیام اٹ فوجی و سلامتی تعلقداری نا بابت سوج انا ورندی ٹی پارے کہ اوغانستان آن امریکی انخلاء آن پد کنے معلوم اف کہ پاکستان و امریکہ نا نیام اٹ فوجی تعلقداری ہراوڑنامریرہ ولے داوخت آ دا تعلقداری اوغانستان آن امریکی انخلاء آن مست ویل انا سیاسی ایسری نا اسیجائی مسخت نا بنداو آ استوار بایدے مریر انتئے کہ پاکستان اوغانستان اٹی خونی خانہ جنگی خواپک و کنے یقین ءِ کہ امریکہ ہم اوغانستان اٹی اسٹ یا 2کھرب ڈالر خڑچ کننگ آن پد خواپک کہ دا ملک شعلہ غاتے ٹی ہشنگسا کے ہنداخاطرآن ننا مسخت آک اسٹ ءُ۔ وزیراعظم پارے کہ پاکستان طالبان تیا تینا زیات آن زیات اثرورسوخ ءِ استعمال کرے۔ اوپارے کہ پاکستان ہمومسہ ملک آتیان اسٹ ءِ ہرافک 1996ء آن پد طالبان تے امنا کریر۔ وزیراعظم پارے کہ اوغانستان آن امریکی انخلانا تاریخ نا پڑو مننگ آن پد طالبان تیا ننا اثرورسوخ کم مس و دانا سوب دادے کہ ہندن کہ امریکی انخلاء نا تاریخ نا پڑو مس طالبانک سرسہبی نا دعویٰ کریر، اوسوچنگ ءُ کہ اوفک جنگ ءِ کٹار، ہنداخاطرآن داسہ او تینے سوگو تکرہ و اوفتیا ننا اثرورسوخ کم مسنے۔ وزیراعظم پارے کہ طالبانک ہیت وگپ آ آمادہ متورہ، نن تینا اثرورسوخ اٹ اوفتے امریکہ تون گپ وتران آ راضی کرین و اوغان حکومت تون مذاکرات کن اوفتیا زور شاغان و دابھاز مشکل ءُ کاریم اس ئس۔ وزیراعظم تون استفسار کننگاکہ انت پاکستان داسہ طالبان تیا پین اثرورسوخ تخپک ہراڑآ وزیراعظم پارے کہ پاکستان طالبان تیا زور شاغسا کرینے کہ او فوجی فتح نا کسر ءِ ہلپس داممکن اف انتئے کہ اگہ او تینا مچ آ واکداری ءِ کاریم اٹ اتسا فوجی سرسہبی نا دوئی کننگ نا کوشست کیرہ تو اوڑآن اسہ مرغن ءُ خانہ جنگی اس سرنگ کیک و اوغانستان آن پد ہراملک داحالیت آتیان غٹ آن زیات زہمی مریک او پاکستان ءِ انتئے کہ پاکستان اٹ اوغانستان آن ہم زیات پشتون آباد ءُ و طالبان دُن تو بنداوی وڑاٹ اسہ پشتون تحریک اسے تو اونا اِرااثرمرتب مریک، ننے گڑتی ءِ کہ دانانتیجہ ٹی پاکستان اٹ باہوٹ آتا بھلو کچ اس بریک وخت اس کہ پاکستان ءِ مہالوآن 30لکھ اوغان باہوٹ آتا ویل مون تروک ءِ۔ وزیراعظم پارے کہ آخبت کن ننا وژن تینا زرگزران ءِ بڑزاکننگ و اوغانستان نا کمک اٹ نیامی ایشیااسکان واپار ءِ مون آ دننگ ءِ، نن نیامی ایشیائی ریاست آتون گچین واپاری تعلقداری کن معاہدہ کرینن ولے نن نیامی ایشیائی ریاست آتسکان رسینگ بیرہ اوغانستان نا کمک اٹ دوئی کننگ کینہ و اوغانستان اٹ خانہ جنگی نا حالیت اٹ داغٹ بیکار مریک۔ اوغانستان نا بارواٹ اسہ سوج اسے نا ورندی ٹی وزیراعظم پارے کہ داسال انا اول اٹ او صدر اشرف غنی تون اوڑدہی کن اوغانستان نا دورہ ءِ کرے و اوغان حکومت ءِ پورو مخ تفی نا باوری کرفے و اوفتے پارے کہ نن امن تصفیہ کن ہرممکن کڑد ادا کینہ۔ اوپارے کہ ننا انٹیلی جنس ایجنسی و اوغان انٹیلی جنس ایجنسی، ننا آرمی چیف، اوغان صدر و اونا آرمی چیف نا نیام اٹ پدریسہ اوڑدہی مرسا کیک، ہنداخاطرآن ننا نیام اٹ آخبتی رابطہ برجاسلک۔ بدبختی اٹ اوغان حکومت اٹ داتم اسکان داتاثر ءِ کہ پاکستان پین گام گیج کننگ کیک ہرانا بارواٹ، ای داپاننگ خواوہ کہ داننکن بھاز مایوس کن ءِ، او کیہی سال آن پد ننے آ زمواری شاغنگ و داکہ تینٹ تصفیہ سے آ سرمتنے۔ وزیراعظم عمران خان پارے کہ طالبان نا برخلاف فوجی واکداری ءِ کاریم اٹ اتنگ آن بیدس نن ہرگام گیج ءِ کینہ۔
