اسلام آباد۔ 12جون (اے پی پی) وزیراعظم عمران خان اسلاموفوبیا نا ودوک آ واقعہ غاتا رداٹ اسہ وار ولدا جہانی راہشون تیا زور شاغانے کہ سوشل میڈیا غا خارتالان کروک و انتہاپسندی نا برخلاف کریک ڈاؤن کننگے، خار تالان کروک آ ویب سائٹ آتا برخلاف جہانی کہول آ بایدے کارروائی مرے، گڑاس جہانی راہشون و دیکی ملک آتا سرکڑدہ غاک داباندات ءِ پہہ مفننگ ءُ، آجوئی سلاہ درشانی نا حد ہموتسکان ءِ ہراتسکان ایلوانسان اوڑآن مجروح مف۔ داخیال آتا درشانی ءِ او لندن انٹاریوٹی مسلمان تے شست کننگ و اسلاموفوبیانا ودوک آ واقعہ غاتا بابت کینیڈین براڈ کاسٹنگ کارپوریشن (سی بی سی) ءِ اسہ انٹرویو اسے ٹی کرے ہرا(اینو) یک شنبے نادے آ شینک کننگک۔یات سلے کہ لندن انٹاریو جلہو اٹی کینیڈاٹی رہینگوک آ پاکستانی خاہوت نا 4بندغ زوال کریسر وخت اس کہ اسہ نہہ سال انا ماراس ٹھپی مسوسس، جنونی جلہوگیر اوفتیا ٹرک ءِ لگفیسس۔ کینیڈا نا پولیس پاریسس کہ پاکستانی خاہوت ءِ ہنداخاطرآن شست کننگاانتئے کہ او مسلمان ئسر۔ داخاہوت 2007ء ٹی پاکستان آن کینیڈاغا ہناسر۔ وزیراعظم عمران خان داواقعہ نا ٹویٹر آ ترندی اٹ مذمت ءِ کرسا اودے دہشت گردی گوندا و دیکی ملک آتے ٹی اسلاموفوبیا نا ودوک آ واقعہ غاتیا گڑتی نا درشانی ءِ کرے۔ ”سی بی سی“ ءِ انٹرویوٹی وزیراعظم عمران خان پارے کہ پاکستان اٹی داواقعہ نا بھاز بھلو اثراس مسنے ہراٹی اسہ پاکستانی خاہوت اسے شست کننگا۔ وزیراعظم پارے کہ دیکی ملک آتے ٹی انتہاپسندی و اسلاموفوبیا نا ودوک آ واقعہ غاک داہیت انا متقاضی ءُ کہ جہانی راہشون داویل ءِ سنجیدگی اٹ ہلے و دانا توننگ کن سخت گام گیج کے۔ اوپارے کہ ہموویب سائٹ آک ہراخار تالان کننگ نا سوب ءُ، نا برخلاف جہانی کہول آ سخت کارروائی کننگے۔ وزیراعظم پارے کہ او تینا کینیڈین ہم منصب جسٹن ٹروڈوتون دامعاملہ ءِ ہرفینے و اوداویل انا اہمیت آن معلومدار ءِ، او ہندن ءُ راہشون اسے ہراآن لائن خارتالان کننگ و اسلاموفوبیا نا بابت ادراک تخک ولے ایلو جہانی راہشونک ہم دامعاملہ نا اہمیت ءِ بایدے سمجھر و داڑتون مون تننگ کن گام گیج کیر۔ وزیراعظم پارے کہ گڑاس دیکی و جہانی راہشون دامعاملہ نا اہمیت نا ادراک ءِ کپننگ ءُ۔
