پاکستان آذربائیجان تون واپار، دفاع، دودوربیدگ وسیل و سوات اٹی تعلقداری تے پین سوگوی تننگ خواہک، صدر مملکت ڈاکٹر عارف علوی

اسلام آباد۔ 04جون (اے پی پی) صدر مملکت ڈاکٹر عارف علوی پارینے کہ پاکستان آذربائیجان تون واپار، دفاع، دودوربیدگ وسیل و سوات اٹی تعلقداری تے پین سوگوی تننگ خواہک، پاکستان آذربائیجان تون تعلقداری تے بھاز اہمیت ایتک۔ ایوان صدر نا میڈیا ونگ آن جاری بیان نا رداٹ داخیال آتا درشانی ءِ او اسپیکر آذربائیجان پارلیمنٹ پروفیسر غفار وواتون گپ وتران کرسا کرے ہراجمعہ نادے آ داڑے اوڑتون اوڑدہی کرے۔ صدر مملکت پارے کہ پاکستان آذربائیجان تون واپار، دفاع، دودوربیدگ وسیل و سوات اٹی تعلقداری تے پین سوگوی تننگ خواہک، پاکستان آذربائیجان تون تعلقداری تے بھاز اہمیت ایتک۔ اوپارے کہ ہڑتوم آ ملک آک مذہب، قدر، دودوربیدگ وعلاقائی و جہانی امور آ اسیجائی خیال تخرہ۔ صدر مملکت ہڑتوم آ کنڈآتا کمکاری ءِ پین سوگو کننگ کن بڑزکو کہول آ سیاسی، دودوربیدگی و زرگزرانی ڈل آتا ہن و برآ زور شاغا۔ داوخت آ اسپیکر آذربائیجان پارے کہ اقتصادی، سیاسی، دودوربیدگی و اسٹریٹجک کہول آ ہڑتوم آ ملک آتا نیام اٹ رابطہ غاتے ودفنگ نا گرج ءِ۔ ہڑتوم آ ملک آتا الس نا نیام اٹ رابطہ غاتا مون آ دننگ کن دودوربیدگی تعلقداری تے مون آ دننگ نا گرج ءِ۔ پروفیسر غفاروواپارے کہ آذربائیجان نا الس و سیاسی سرکڑدہ نگورنوکاراباخ آ مخ تفی کن پاکستان نا منت وار اُن۔ آذربائیجان کشمیر آ پاکستان نا موقف نا ہرکہول آ مخ تفی ءِ برجاتخک۔