اسلام آباد۔ 04جون (اے پی پی) چیئرمین سینیٹ صادق سنجرانی پارینے کہ پاکستان وآذربائیجان نا تعلقداریک تین پہ تینی پت و بھروسہ غا مبنی ءُ، ہڑتوم آ ملک آتا نیام اٹ پارلیمانی ادارہ جاتی کمکاری ءِ پین ودفنگ نا گرج ءِ، کثیر الجہتی بشخ آتے ٹی کمکاری، واپار، توانائی و ایلو کہول آ رابطہ غاتے مون آ دننگ کن سنبرینگوک اُن۔ داخیال آتا درشانی ءِ او آذربائیجان نا اسپیکر صاحبہ گفارواتون اوڑدہی ٹی کرے ہرا جمعہ نادے آ چیئرمین سینیٹ تون پارلیمنٹ ہاؤس اٹی اوڑدہی کرے۔ پارلیمنٹ ہاؤس آ بننگ آ چیئرمین سینیٹ ڈل ءِ بخیر اٹ پارے۔ چیئرمین سینیٹ پارے کہ ڈل انا دورہ پاکستان کن بھاز اہم ءِ، پاکستان آذربائیجان تعلقداری اسیجائی تاریخی، دودوربیدگی و مذہبی مماثلت آتیا مبنی ءُ۔ چیئرمین سینیٹ ڈل انا اقتصادی کمکار تنظیم نا پارلیمانی اسمبلی نا جنرل کانفرنس اٹ بشخ ہلنگ آ منت واری ءِ ہرفے۔ اوپارے کہ پاکستان و آذربائیجان تعلقداری تین پہ تینی پت آ مبنی ءِ، پارلیمانی و ادارہ جاتی کمکاری ءِ پین ودفنگ نا گرج ءِ۔ اوپارے کہ ڈل آتا ہن و بر اٹ ترندی، واپاری رابطہ و السی کہول آ رابطہ کاری ہڑتوم آ ملک آتے پین خڑک اتیک، بڑزکو کہول آ پارلیمانی رابطہ و ڈل آتا ہن و برنا چرجوئی ءِ بایدے برجاتخنگے، پارلیمانی سنگتی پڑک ءِ پین فعال کننگ نا گرج ءِ۔ چیئرمین سینیٹ پارے کہ کثیر الجہتی بشخ آتے ٹی کمکاری، واپار، توانائی و ایلو کہول آ رابطہ غاتے مون آ دننگ کن سنبرینگوک اُن، پاکستان آذربائیجان تون ہڑتوم آ کنڈآتا کمکاری ءِ اہمیت و قدر انا نظر اٹ ہرک۔ اوپارے کہ پاکستان و آذربائیجان نا نیام اٹ بے مٹ کمکاری تین پہ تینی پت ءِ پاش کیک، جہانی ویل و اہم باندات آ ہڑتوم آ ملک آک اسہ ایلو نا نقطہ نظرنا مخ تفی ءِ کرینو۔ اوپارے کہ پاکستان نگورناکاراباخ نا ویل آ آذربائیجان نا موقف نا پبی مخ تفی ءِ کیک۔ صادق سنجرانی پارے کہ پاکستان آذربائیجان ءِ داوخت آ کورونا نا دین مون تروک ءِ۔ اسیجائی حکمت عملی نا رداٹ دین انا مون ءِ توننگ مریک۔ چیئرمین سینیٹ بڑزکو ایوان نا کڑد و کاریم نا وڑوڈول نا بارواٹ معلومدار کرے۔ اوآذربائیجان نا کمک وکمکاری آ منت واری ءِ ہرفسا داعزم انا درشانی ءِ کرے کہ آخبت اٹ ہم دابے مٹ کمکاری برجاسلک۔ اوڑدہی ٹی سینیٹ اٹی قائد ایوان سینیٹر ڈاکٹر شہزاد وسیم، سینیٹر فدامحمد، سینیٹر دلاور خان، سینیٹر نزہت صادق، سینیٹر رخسانہ زبیری، باسک قومی اسمبلی شاندانہ گلزار خان، سیکرٹری سینیٹ محمد قاسم صمدخان ئسک ہم ساڑی ئسر۔
