اسلام آباد۔ 01جون (اے پی پی) پائیکو کانفرنس نا سے شنبے نادے آ داڑے بنائی دیوان آن پد ہزاریہ شونداری ہدف آتا دوئی کننگ آ کوویڈ۔ 19نا اثرآتا بابت پینل ڈسکشن سیشن اس مس۔ دیوان نا کماشی ءِ باسک قومی اسمبلی ریاض فتیانہ کرے۔ دیوان اٹی قومی اسمبلی نا باسک ڈاکٹر نفیسہ شاہ، ڈاکٹر نوشین حامد، ڈاکٹر عائشہ غوث بخش تون اوار اوغانستان، تاجکستان، ترکمانستان، آذربائیجان و پائیکو کانفرنس نا باسک ملک آتا پارلیمنٹرین آک بشخ ہلکر۔ ریاض فتیانہ بشخ ہلوک آتے پاکستان نا کنڈآن کورونا حالیت آتا بابت پارے کہ پاکستان ہزاریہ شونداری ہدف آتا دوئی کننگ کن ٹاسک فورس اس جوڑ کننگانے و دانا مرکزی سیکرٹریٹ پارلیمنٹ نا چاروکی ٹی کاریم کیک۔ پاکستان نا پارلیمنٹ ایس ڈی جیز نا بابت کانود سازی کننگ ءِ۔ مانیٹرنگ، کوآرڈنیشن، آؤٹ ریچ و الس اٹ شعور تالان کننگ نا بنداوی اصول آتا رداٹ ایس ڈی جیز نا دوئی کننگ نا چرجوئی برجاءِ۔ داڑتون اوار اوار کورونا دین انا حالیت آتا رداٹ لاک ڈاؤن، راجی فاصلہ غاتے برقرار تخنگ کن گام گیج کننگ انگ ءِ، ننے داحالیت آتے ٹی اسہ ایلو نا آزموندہ غاتیان فائدہ ہرفوئی مریک۔ اوپارے کہ اقتصادی کمکار تنظیم نا باسک ملک آتے السی کہول انا رابطہ غاتا مون آ دننگ کن ویزہ نا آسراتی فراوان کروئی مریک۔ ایس ڈی جیز2030ء وژن نا رداٹ خطرناک ملک آتے اسہ ایلو تون اواری اٹ کاریم کروئی مریک۔ پارلیمانی سیکرٹری جان جوڑی ڈاکٹرنوشین حامد پارے کہ کورونا دین انا حالیت آتے ٹی داوخت آ غٹ آن زیات چکار ویکسین آ تننگ انگ ءِ۔ مچ آ دنیا ٹی ویکسین نا تیاری کن پبی کوشست کننگا۔
