زیارت۔ 01جون (اے پی پی) وزیراعظم عمران خان پارینے کہ قوم ءِ خوشخبری ایتنہ کہ ملک بھازمشکل وخت آن پیش تمانے، مستین نا حکومت آک بلوچستان ءِ گوجالار، نن سیوتی حکومت مننگ آن پد ہم بلوچستان ءِ نمان فنڈتسن، 700ارب روپئی نا پیکج تسن وخت اس کہ داسہ سڑک آتا پیکج تننگ اُن، زیارت اٹی ایل این جی پلانٹ کن بروک آ مالی سال اٹی پبی کوشست کینہ، زیارت سیل و سوات نا ہنداس جوڑ مننگ کیک، خیبرپختونخوا ٹی ننا حکومت سیل و سوات ءِ مون آ درے ہراڑآن روزگار و کاروبار ودا۔ او سے شنبے نادے آ قائد اعظم ریذیڈنسی زیارت اٹی دود آن تران کریکہ۔ داوخت آ وزیراعلیٰ بلوچستان جام کمال خان تران کرسا وزیراعظم ءِ بخیر اٹ پارے۔ وزیراعظم عمران خان وزیراعلیٰ بلوچستان نا کنڈآن تینکن پاروک آ جوان انگا ہیت آتیا اونا منت واری ءِ ہرفسا پارے کہ اودے 20سال مست زیات آ بننگ نا اتفاق مسوسس ولے اینو اونا فضائی جاچ ءِ ہلکوٹ۔ اپڑس نا متکن آ درخت آتے خناٹ ہرافتا بارواٹ نن خوانانہ، قائد اعظم تینا زند انا آخیریکو دے تے ہراڑے گدریفے ہموتاریخی جاگہ ءِ ہُننگ کن بسونٹ۔ وزیراعظم داوخت آ ایف سی نا شہید ورناتے خراج عقیدت پیش کرسا اوفتا خاہوت آتے کن صبر وجمیل نا دعاکرے۔ وزیراعظم پارے کہ نن بلوچستان ءِ تینا سمجھان، مہالونا حکومت آک بلوچستان ءِ ہچ اس تتوس بلکن اوڑآن ہلکر، ننا حکومت مشکل حالیت آتے ٹی ہراتم تدوک آ حکومت آتا وام تے ہم پدی تروئی ئسک اوکان پد ہم اخس کہ مننگ کرے بلوچستان کن فنڈتسنے، بلوچستان آ مستین اٹ چکار کننگتو، پیسہ خڑچ کننگتو، ہراپیسہ غاتے تننگا اگہ ہمو سہی خڑچ مروسر تو بلوچستان نا تقدیر بدل مسکہ۔ وزیراعظم پارے کہ قوم اکن خوشخبری ءِ کہ ملک بھاز مشکل وخت آن پیش تمنگ ءِ، ننا مخالف آک اول شورکننگ نا بناءِ کریر کہ حکومت بے سہب مسنے، او خوائسرہ کہ داسرسہب مفس، اوفتے خطرہ ئس کہ اگہ دا حکومت سرسہب مس تو اوفتا سیاسی دوکانک بند مریرہ، ہنداخاطرآن اوفک زرگزران نا تباہی، کبینی نا غوغاءِ کننگ نا بناءِ کریر۔ وزیراعظم پارے کہ شرح نمو 4 درسد مننگ آ اپوزیشن شورکننگ ءِ کہ داحساب وکتاب غلط ءِ، اوفتا مشکل آتیا ترس بریک، او وخت اس کہ حکومت نا چٹفنگ کن مسہ تُو انا وخت ایترہ تو وخت اس دسمبر نا تاریخ، کنے گڑتی ءِ کہ دا اسہ ایلوڑتون ہم سلپسہ۔ وزیراعظم پارے کہ بروک آ سال شرح نمو ٹی پین ودکی مریک وخت اس کہ اوکان پد ہرا ننا حکومت بریک اوٹی پین شونداری مریک۔ وزیراعظم پارے کہ واکداری دوئی کننگ آن پد یا تو تینکن گڑاس کننگ کیک یا تو قوم اکن، ای لندن اٹ کبین انگا علاقہ غاتے ٹی جائیداد آتا سجفتوٹ، ہرا ملک آک شون ہلکر ہموجاگہ نا حکمرانک تینا ملک اٹ تولسا ملک انا خذمت ءِ کریر، اوفتا ہچ ءُ پیشن نا ملک آتے ٹی جائیداد اس الوکہ، اوفتا چناک پیشن نا ملک آتے ٹی خوانتورہ، مہاتیر محمد و سنگاپور نا درور غٹ انا مون آٹے۔ وزیراعظم پارے کہ اگہ ملک آن پیسہ دُزی کرسا پیشن دیر و سمجھرکہ ملک شون ہلیک تو دا مننگ کپک۔ وزیراعظم پارے کہ پاکستان داخاطرآن شون ہلیک کہ اودے اللہ ہروڑنا نعمت تسنے۔دانا ننے تینٹ ہم علم اف، مستین اٹ حکمرانک چھٹی تے ہم پیشن گدریفیرہ ہنداخاطرآن اوفتے اونا احساس الوکہ۔ وزیراعظم پارے کہ زیات سیل و سوات نا مرکز جوڑ مننگ کیک، داڑآن ہندی مخلوق ءِ کٹیادوئی مریک، روزگار اٹی ودکی و نیزگاری ٹی کمتی بریک، خیبرپختونخوا ٹی ہراتم ننا حکومت بس تو ہموڑے دہشت گردی ئس، کاروبار بند ئس، برمتہ تاوان بھلو کاروبار اس جوڑ مسوسس، مخلوق پشاور ءِ ہلسا اسلام آباد اٹ آباد مسرہ، یواین ڈی پی نا رپورٹ نا رداٹ 2013ء آن 2018ء اسکان خیبرپختونخوا ٹی غربت ترندی اٹ کم مس، ہزگار نیزگار نا پرخ کم مس، انسان تیاغٹ آن زیات خڑچ مس، دانا بھلا سوب سیل و سوات نا مون آ دننگ ئس داڑآن روزگار نا وارخواہی و کاروبار ودا، نیمہ آبادی ءِ دادور اٹی وخت اس کہ ایلوفتے داسہ جان جوڑی کارڈ تننگا، داجان جوڑی کارڈ آخا بلکن ہیلتھ انشورنس اسے۔ زوت مچ آ پنجاب اتون ہم دا جان جوڑی کارڈ مریک، داڑآن خلقی علاقہ غاتا تہہ ٹی ہم جان جوڑی نا گچین آسراتی دوبریک، ہسپتال آتا جال اس تالان مریک، نجی بشخ خلقی علاقہ غاتے ٹی ہسپتال جوعڑ کننگ کن مون آ بریک۔ اووزیراعلیٰ بلوچستان ءِ مخاطب کرسا پارے کہ اگہ تینا مخلوق نا اصل خذمت ءِ کروئی ءِ تو بلوچستان اٹ ہرخاہوت ءِ جان جوڑی کارڈ انا آسراتی تننگے۔ نیزگار اُراتا داڑآن زیات ہچ ءُ خذمت اس مننگ کپک۔ وزیراعظم پارے کہ زیارت اٹ شدید یخ و یخ انگا تہوک چلینگرہ، داڑے گیس پیپ لائن نا جاگہ غا ایل پی جی نا پلانٹ خلنگ زیات قابل عمل ءِ۔ دانا فزیبلٹی آ ہیت کیوہ، پورو کوشست کینہ کہ بروک آ مالی سال اٹی داڑآ کاریم نا بناءِ کین۔ وزیراعظم پارے کہ اودے ہروئی تمک کہ اخس پیسہ ارے، ای بادشاہ آخا بلکن وزیراعظم اُٹ، مستین اٹ ہراوڑ بادشاہ اشرفی تا تھیلی خسارہ داوڑحکمران اعلانک ئسر۔ اوپارے کہ مستین اٹ بلوچستان ءِ گوجالنگا، داننا فرض ئس کہ سیوتی حکومت مننگ آن پد ہم دانا پورو کمک ءِ کین، بلوچستان اسہ بھلو علاقہ اسے۔
