کراچی۔ 27 مئی (اے پی پی) بنجائی وزیر داخلہ شیخ رشید احمد پارینے کہ امن وایمنی سندھ حکومت نا زمواری ءِ، سندھ حکومت خوائے تو نن کمک کننگ کن تیار اُن، داڑیل آتا برخلاف دہشت گردی نا مقدمہ درج کرفنگے، انت کہ گڑاسے نا ضرورت تما وزارت داخلہ مہیا کیک، رینجرز ساڑیءِ، سندھ حکومت ہراتم خوائے داڑیل آتا برخلاف آپریشن اٹی اوفتا خذمت ءِ ہلنگ کیک۔ بنجائی وزیر داخلہ شیخ رشید احمد داخیال آتا درشانی ءِ وزیراعلیٰ سندھ سید مراد علی شاہ تون پنچ شنبے نادے آ داڑے وزیراعلیٰ ہاؤس اٹی اوڑدہی نا وخت آ کرے۔ جاری کروک پریس ریلیز نا رداٹ اوڑدہی ٹی بنجائی سیکرٹری داخلہ یوسف نسیم کھوکھر، ڈی جی علی نواز، سلاہکار کانود، چیف سیکرٹری ممتاز شاہ، آئی جی سندھ مشتاق مہر ئسک ہم ساڑی ئسر۔ داوخت آ وزیراعلیٰ سندھ سید مراد علی شاہ پارے کہ اونا حکومت درکار حساس سازوسامان تا بست وبند ءِ کننگ ءِ، زوت کچے نا علاقہ غان داڑیل آتے چٹفنہ۔ اوپارے کہ پاکستان خطرناک ملک آتا لڑاٹ شش میکو نمبر آ ئس داسہ 126آ ٹے۔ مہالو سندھ اٹی دراستی راستی مروک آتون سفر کریرہ، 2007ء ٹی پیپلزپارٹی نا حکومت گرینڈ آپریشن کرسا ہائی ویز آتے کلیئر کرفے، کراچی ٹی ہم امن و ایمنی داخہ خراب ئس کہ نوگوایریاجوڑ مسوسس، مچ آ سندھ گڈوآن کوٹڑی بیراج اسکان کچا ایریاءِ، بیرہ 6,5کلومیٹر پژغن جنگل ءِ۔ کشمور سہ رخی بارڈر نا شار ءِ۔ پنجاب، بلوچستان و سندھ انا بارڈر آتے اسہ ایلو تون ملفک۔ جنگل اٹی ڈوہدار بندغ آک ڈیرہ نا کسر دریاٹی دیر بننگ آن بند کیرہ۔ اوپارے کہ 23 مئی آ پولیس ہشت مغوی تے شکارپور نا کچے آن بازیاب کرفنگ کن آپریشن کرے، بکتر بند گاڈی خراب مننگ نا سوب آن داڑیل آ جلہو کریر، جلہو اٹی اِراپولیس کارندہ شہید مسر۔ وزیراعلیٰ سندھ پارے کہ نی وزیر داخلہ اُس، ناہراتم است کشے بر، نن اواری اٹ کاریم کینہ، نے سندھ اٹی بخیر اٹ پانہ۔ وزیراعلیٰ سندھ پارے کہ گڑاس حساس سازوسامان درکار ءِ، اونا بست وبند ءِ سندھ حکومت کننگ ءِ، وزارت داخلہ ہم کمک کے، نن زوت کچے نا علاقہ غان داڑیل آتے چٹفنہ۔
