اسلام آباد۔ 26 مئی (اے پی پی) حکومت نا کنڈآن لس گچین کاری تے دھاندلی نا عنصر آن پاک و ساف و شفاف کننگ کن ہرا اصلاحات آتے تیار کننگانے اوفتا رداٹ الیکشن کمیشن ءِ بڑزکو عدلیہ آنبار واکدار و مالی اعتبار اٹ وتواجہ جوڑ کننگک، کمیشن تینا بجٹ ءِ تینٹ جوڑ کننگ کیک، شفافیت کن الیکٹرانک وونٹنگ مشین درستی راستی کرفنگک،سینیٹ گچین کاری تیٹی ہارس ٹریڈنگ و ہل و تس ءِ توننگ کن اوپن بیلٹ نا وڑوڈول ءِ اختیار کننگک۔ داڑکن آئین نا آرٹیکل 226 اٹی ترمیم کننگک۔ سرکاری حوالی نا رداٹ سلاہ ئی اصلاحات نا رداٹ اسہ جماعت اس ہم ہمووخت اسکان رجسٹرڈ مننگ کپک ہراتم اسکان اونا 10 ہزار رجسٹرڈ کارندہ مفس۔ داڑتون اوار اوار داہم المی مریک کہ انٹراپارٹی الیکشن سالانہ بنداو تیا و باقاعدگی اٹ پارٹک کنونشن اڈ ترفر۔ پاکستانی پردیسی تے وونٹ انا حق تننگ کن کانود درستی راستی کرفنگک، سلاہ نا رداٹ اسہ ہندن ءُ کانود اس درستی راستی کرفنگک کہ گچین مروک ءُ باسک اس اگہ رکنیت نا سوغند ہرفپک تو 60 دے آن پد دا نشست خورک مریک و داڑے دُوارہ گچین کاری مریک۔ سیاسی جماعت آتا تہہ ٹی جمہوریت اتنگ کن گام گیج اتنگک۔ حلقہ بندی تا بابت سلاہ کننگانے کہ حلقہ بندیک آبادی تا جاگہ غا اسہ وڑ وونٹ انا بنداو آ مریرہ و داڑکن کانود اٹ ترمیم کننگک۔ اگہ داڑآ کس اسے گڑتی مرے تو اواونا برخلاف سپریم کورٹ تون رابطہ کننگ کیک۔ داہم سلاہ کننگانے کہ پندار کاغد آتا فیس اٹی ودکی کننگک۔ داہم سلاہ کننگانے کہ اومیتدار نا کنڈآن اسہ پولنگ ایجنٹ نا جاگہ غا پنچ پولنگ ایجنٹ پندار کننگ مریک۔
