اسلام آباد۔ 20 مئی (اے پی پی) وزیراعظم عمران خان چینی ہم منصب لی کی چیانگ تون ٹیل فون آ گپ وتران کرے ہراٹی پاک چین سفارتی تعلقداری تا 70 می سال دے، ہڑتوم آ کنڈآتا تعلقداری و کورونا ویکسین نا فراوانی ٹی کمکاری آ گپ وتران کننگا۔ وزیراعظم چینی ہم منصب و سرکڑدہ غاتے مریخ آ چینی خلائی جہاز نا سرسہب لینڈنگ آ مبارکبادی تس ہراچین نا ودوک آ تکنیکی لائخی ءِ تالان کرے۔ وزیراعظم عمران خان زور شاغسا پارے کہ تدوک آ سال تے ٹی اجتماعی و انتھک کوشست آتیان پاکستان و چین تیناتعلقداری تے سدابہار تزویراتی شریداری ٹی بدل کرینو۔ چین پاکستان اقتصادی راہداری (سی پیک) بیلٹ اینڈ روڈ انیشی ایٹیو نا فلیگ شپ ڈٹ ءِ و دازرگزرانی سرجزآتے ترند و روزگار نا وارخواہی ودی کرینے و داڑآن ہڑتوم آ کنڈآتا و علاقائی واپار اٹی پین ودکی مریک۔ اوپارے کہ سال 2021ء اسہ خاص ءُ موقع اسے انتئے کہ دا پاکستان و چین نا نیام اٹ سفارتی تعلقداری تا قیام نا 70 می سال دے نا سال ءِ ہرادے ہڑتوم آ فریق آک پبی وڑاٹ اڈ ایترہ۔ وزیراعظم داوخت آ چینی وزیراعظم ءِ مبارکبادی تس۔ وزیراعظم عمران خان کوویڈ۔ 19 تون مون تننگ اٹ پاک چین کمکاری ءِ مون آ تخسا کورونا ویکسین نا فراوانی ٹی چین نا پاکستان ءِ برجاکمکاری آ است انا حب اٹ سفت ءِ کرے۔ اوپاکستان اٹ ویکسین تیار کننگ نا آسراتی نا قیام کن نیشنل انسٹی ٹیوٹ آف ہیلتھ(این آئی ایچ) ءِ کمک فراوان کننگ آ چین نا منت واری ءِ ہرفے ہراکوویڈ۔ 19 نا مقابلہ ءِ کننگ کن پاکستان نا کوشست آتے پین سوگو کیک۔ وزیراعظم ہڑتوم آ ملک آتا نیام اٹ اسٹریٹجک کمکاری ءِ پین سوگو کننگ کن بڑزکو کہول انا تبادلہ نا رفتار ءِ برجاتخنگ نا گرج آ ہم زور شاغا۔ ہڑتوم آراہشونک پاک چین ہڑتوم آ کنڈآتا تعلقداری تے پین سوگو کننگ نا عزم انا درشانی ءِ کریر۔
