اسلام آباد۔ 20 مئی (اے پی پی) پاک چین صنعتی کمکاری پاکستان ءِ ڈیہہ ٹی پیدواری ہنداس جوڑ کیک، صنعتی زون تا جوڑ کننگ آن ہندی صنعت کار آتے کن زرکاری نا بے شمار وارخواہی ودی مریک، چینی صنعت آتا پاکستان اٹی گدریفنگ آن بے روزگاری نا چٹفنگ، چندی بشخ آتے ٹی معلومداری تا تبادلہ و چاہنداری ٹی ودکی مریک۔ چین پاکستان اٹی سی پیک نا رداٹ داسہ پوسکن ءُ زرکاری اس کرینے و تدوک آ سال 2020ء ٹی دا زرکاری 11 بلین ڈالر آن گدرینگا ہرا 2015ء آن پد چین نا ارٹ میکو بھلا زرکاری ءِ، سی پیک نا داسہ ارٹ میکو ریسہ بناکرینے داریسہ ٹی صنعتی کمکاری آن و کشت و کشار نا مون آ دننگ نا ڈٹ آتا سوب آن اولیکو ریسہ غان ہم زیات گیشتر و نمان اثرمرتب مریک، زند انا ہر بشخ وڑانا وڑاسے ٹی سی پیک تون گنڈوک ءِ۔ ہنداخاطرآن اگہ پاننگے کہ ”سی پیک غٹ اکن“ تو داڈٹ انا وژن نا گچین عکاسی مننگ کیک۔ دااسہ خالص شونداری ڈٹ اسے ہرانئے بیرہ چین و پاکستان اسکان محدود ءِ بلکن مچ آ ڈیہہ کن شونداری و شونہالی نا ضامن ءِ، ہنداخاطرآن پاکستان و چین ہڑتوم آ ک سی پیک نا غٹ ڈٹ آتے وخت آ پورو کننگ نا عزم تخرہ۔ پنچ شنبے نادے آ اے پی پی تون گپ وتران کرسا بنجائی وزیر ڈٹ بندی شونداری و اصلاحات و خصوصی گام گیج اسد عمر پارے کہ سی پیک نا رداٹ درملکی زرکارآتے زیات آن زیات آسراتی تننگک۔ اوپارے کہ فیصل آباد اٹی علامہ اقبال خصوصی اقتصادی زون و رشکئی خصوصی اقتصادی زون آ کاریم جوانی اٹ برجاءِ و بھلو کچ اسے ٹی زرکارآک دا اقتصادی زون تے ٹی سرمایہ خلنگ اٹ است خواہی ظاہر کرینو۔ وزیر ڈٹ بندی پارے کہ درملکی زرکارآتے زیات آن زیات آسراتی تننگک۔ سی پیک اتھارٹی نا چیئرمین عاصم سلیم باجوہ پارے کہ پاکستان چین پاکستان اقتصادی راہداری نا ارٹ میکو ریسہ ٹی صنعتی و کشاری شونداری و گچین سڑک رابطہ غاتا سوب آن فائدہ ہرفنگ نا بناءِ کیک۔ سی پیک نا ارٹ میکو ریسہ پاکستان اٹ نیزگاری نا چٹفنگ و جی ڈی پی نا نموٹی اہم کڑد ادا کیک۔ اوپارے کہ حکومتی سازگار پالیسی تا کمک اٹ زرکارآتے غٹ ممکنہ آسراتی فراوان مننگ ءِ۔ اسہ ڈیہہ اسہ شاہراہ ڈٹ ساڑی صدی نا تقدیر ءِ بدل کیک ہراٹی چین پاکستان اقتصادی راہداری اسہ اہم ءُ ڈٹ اسے۔ اوپارے کہ سی پیک نا رداٹ خصوصی اقتصادی زون آہم ترندی اٹ کاریم برجاءِ۔ رشکئی و علامہ اقبال اکنامک زون فیصل آباد خصوصی زون آ اولیتی بنداوتیا کاریم برجاءِ۔ چیئرمین بورڈ آف انویسٹمنٹ عاطف آر بخاری پارے کہ سی پیک نا ارٹ میکو ریسہ ٹی نجی بشخ و صنعت کارآتے اولین کڑد ادا کروئی مریک، حکومت نا کڑد بیرہ کمکار نا مریک ہرا زرکاری کن سازگار چاگڑدو کاروبار موافق گچین کانود سازی نا عمل ءِ برجاتخک۔ اوپارے کہ ’سی پیک صنعتی کمکاری نا ڈرافٹ فریم ورک ایگریمنٹ لانگ ٹرم پلان تون مطابقت تخک، دامعاہدہ غان پاکستان کن صنعت آتے شونداری تننگ نا کیہی وارخواہی دوبریک۔ سفیر پارے کہ چین زرکارآتا پبی است بڈی ءِ برجاتخک تانکہ او دازون تے ٹی زرکاری نا وارخواہی تیان فائدہ ہرفر۔ چین پاکستان اقتصادی راہداری دٹ انا مریس مدتی پلان اٹ پاننگانے کہ چین پاکستان نا ٹیکسٹائل نا صنعت آتا شونداری کن پاکستان نا زیات تر منڈی تسکان اڑزآن خام مال سرکننگ کیک۔ ہراکہ کاشغر اٹ ودکی افرادی قوت ءِ کاریم اٹ اتنگ اٹ ہم کمکار مریک۔ ڈٹ انا رداٹ جوڑ مروک آ پوسکن آ انڈسٹریل پارک آتے ٹی زرکاری کن کمپنی تے متوجہ کننگ کن اولیتی پالیسی تا گرج مریک۔ گوادر فری زون اٹ زرکاری نا چرجوئی بناکرینے ہراڑے اسٹیل، پٹروکیمیکلز و ایلو صنعت آتا جوڑ کننگ آ کاریم بناکرینے۔ شونداری کاریم تا سوب آن روزگار اٹی ودکی مریک و لکھ آ پوسکن وارخواہی ودی مریک ہراڑآن ملک اٹی شونہالی بریک۔ داڈٹ آتے ایسر اسکان سرکننگ کن امن و سوگوی اسہ المی ءُ عنصر اسے۔
