اسلام آباد۔ 20 مئی (اے پی پی) صدر مملکت ڈاکٹر عارف علوی پارینے کہ حکومت انٹرپرینیور آتے مسابقتی و شفاف کاروباری چاگڑد اس فراوان کننگ کن سنبرینگوک ءِ، پائیدار زرگزران نا قیام کن چندی گام گیج کرینن۔ بنجائی حکومت مالی مشکل آتیان پد ہم پوریاگر برادری ءِ 1.2 کھرب نا پیکج اس تسنے۔ داخیال آتا درشانی ءِ او پنچ شنبے نادے آ فیڈریشن آف پاکستان چیمبرز آف کامرس اینڈ انڈسٹری نا صدر میاں نصیر حیات ماگو نا کماشی ٹی ڈل اتون اوڑدہی ٹی گپ وتران کرسا کرے۔ صدر مملکت پارے کہ حکومت مالی مشکل آتیان پد ہم پوریاگربرادری ءِ 1.2 کھرب روپئی نا مالیاتی محرک پیکج اس فراوان کرینے۔ کورونا ٹی احساس ایمرجنسی کیش پروگرام نا رداٹ 1.5 کروڑ خاہوت آتا مالی کمک ءِ کننگا۔ صدر مملکت پارے کہ حکومت زالبول و معذور بندغ آتا زرگزرانی وتواجہی آ خاص چکار کننگ ءِ۔ حکومت زالبول و معذور بندغ آتے 5 درسد مارک اپ آ وام تننگ ءِ۔ اوپارے کہ پوریاگر برادری ملک انا زرگزرانی شونداری ٹی اہم کڑد ادا کرے۔ پوریاگرآک خراج ایتر تانکہ شونداری سرجزآتے کن پین زر جتا کننگ مرے۔ ڈل صدر ءِ پوریاگربرادری ءِ مون تروک مشکل آتیان معلومدار کرے۔ اعلامیہ نا رداٹ ڈل خراج زرتس وڑوڈول ءِ پین آسان کننگ و جوان کاروباری چاگڑد اس فراوان کننگ نا بابت سلاہ پیش کرے۔ صدر مملکت پوریاگر برادری ءِ ویل آتا ایسری کن ہروڑنا کمک فراوان کننگ نا باور کرفے۔
