لاہور۔ 20 مئی (اے پی پی) وزیراعلیٰ پنجاب سردار عثمان بزدار تون بنجائی وزیر داخلہ شیخ رشید احمد اوڑدہی کرے ہراٹی تین پہ تینی است خواہی نا باندات، سیاسی حالیت و امن آ گپ وتران کننگا۔ پنچ شنبے نادے آ وزارت داخلہ نا کنڈآن جاری بیان نا رداٹ وزیر داخلہ شیخ رشید احمد پارے کہ وزیراعلیٰ عثمان بزدار وزیراعظم عمران خان نا فرنٹ لائن سپاہی اسے۔ وزیراعلیٰ پنجاب سردار عثمان بزدار تون تفوک اُن، وزیراعظم عمران خان نا کماشی ٹی تحریک انصاف نا حکومت مست آن زیات سوگو ءِ۔ ننے ہچ ءُ خلیس اس اف، سیاست اٹ شیف بڑزی مریک کاہک، پیشن گوئی کروک آتا دالک مست آنبار داسہ ہم سڑپسہ۔ اوپارے کہ پنجاب حکومت راولپنڈی نا الس نا ویل آتے اولیتی بنداو تیا ایسر کننگ ءِ، اللہ تعالیٰ نا فضل و کرم اٹ ملک اٹ امن نا حالیت آک است جم ءُ۔ وزیراعلیٰ عثمان بزدار نا کماشی ٹی پنجاب حکومت کورونا دین انا تالانی ءِ توننگ کن وخت آ گام گیج کرینے، بزدار حکومت نا کورونا دین انا چٹفنگ کن گام گیج ستاکڑزک، او پنجاب ءِ اسہ ٹیم ورک اسے نا وڑاٹ چلیفنگ ءِ، وزیراعلیٰ پنجاب عثمان بزدار پارے کہ او سیاست اٹ رواداری، سگ و ایلمی نا قائل ءِ۔ عثمان بزدار پارے کہ او شرافت، شفافیت و دیانت نا اصول آتیا چلینگک۔ بیر ہلنگ نا سیاست ءِ مدامی کن جہہ جاگہ کرینے، مستین اٹ سیاسی مخالف آتے رزاک اٹ بیر ہلنگ نا شست کننگا۔ اوپارے کہ راولپنڈی تحریک انصاف نا قلعہ ءِ، شار انا ویل آتے ایسر کننگ آ پبی چکار ءِ، راولپنڈی کن خصوصی شونداری پیکج اس تیار کرینن۔ صوبہ ٹی الس نا جان و مال انا رکھ اکن غٹ المی گام گیج آتے کرینن۔ کانود نا عملداری ءِ پک کننگانے۔ کورونا غان بچنگ کن ڈاکٹرز، ہیلتھ پروفیشنلز، پولیس و ایلو ادارہ غاک سرتوڑ خواری کننگ ءُ، اوپارے کہ شاری تا کنڈآن ایس او پی تیا عمل آن کورونا نا تالانی کم مریک۔ سلاہکار ڈاکٹر سلمان شاہ ہم داوخت آ ساڑی ئس۔
