اسلام آباد۔ 20 مئی (اے پی پی) چیئرمین کشمیر کمیٹی شہریارخان آفریدی پارینے کہ اشرف صحرائی نا زند کشمیری تیکن قابل تقلید ءِ، اوتینا مچ آ زند کشمیر نا آجوئی و الحاق پاکستان کن جہد کرے، پاکستانی تاکنڈآن اونا شہیدی آ کشمیری تتون ہڑزخواہی کینہ۔ او پنچ شنبے نادے آ داڑے کوزہ گیر بھارتی فوج انا دوتے اٹ اشرف صحرائی نا شہیدی آ حریت راہشون آتون ہڑزخواہی نا وخت آ اڈہلوک آ دود آن تران کریکہ۔ داوخت آ حریت کانفرنس قائدین سید فیض نقشبندی، غلام محمد صفی، محمد حسین خطیب و سید یوسف نسیم و ایلوفک ہم ساڑی ئسر۔ شہریارآفریدی پارے کہ تحریک حریت نا چیئرمین اشرف صحرائی نا شہیدی آ حکومت و مملکت خداداد پاکستان نا الس نا کنڈآن ہڑزخواہی کیوہ۔ شہریارخان آفریدی پارے کہ اللہ پاک اشرف صحرائی و اونا مار جنید اشرف نا شہید ءِ قبول کے، اشرف صحرائی نا زند غٹ کشمیری الس کن قابل تقلید ءِ، شہید مچ آ زند استقامت اٹ کشمیرنا آجوئی و پاکستان آن انضمام کن جہد ءِ برجاتخا۔ شہریارخان آفریدی پارے کہ کوزہ گیر حکومت اشرف صحرائی ءِ طبی امداد تننگ آن انکار کرے ہرانا سوب آن او زیر حراست شہید مس، اشرف صحرائی ءِ اسہ سجفوک ءُ ڈٹ اسے نا رداٹ شہید کننگا۔ بھارتی کوزہ گیر حکومت نا حراست اٹی شہیدی آن پد نشان تے چٹفنگ نا کوشست داہیت انا شاہدی ءِ۔ شہریارخان آفریدی پارے کہ اشرف صحرائی ناجنازہ غا پابندی خلنگا، اونا مسن تے دزگیر کننگا، بھارتی کوزہ گیر حکمران سازش نا رداٹ تحریک آجوئی نا شمع ءِ کسفنگ اٹ لگوک ءِ، حکومت پاکستان، پارلیمانی کشمیر کمیٹی و الس اشرف صحرائی نا خاہوت تون ڈکھ اٹی بریبر نا شریک ءُ۔ شہریارخان آفریدی پارے کہ کشمیر نا تحریک آجوئی ٹی ہم ننا دتر اوار ءِ و مریک۔ نن مقبوضہ کشمیر ءِ ظالم و کوزہ گیر بھارتی حکمران تیان آجو کرفنگ آن بیدس آرام اٹ تولپنہ۔
