اسلام آباد۔19مئی (اے پی پی): مزن وزیر عمران خان ءِ مشیر برائے پارلیمانی کار ڈاکٹر بابر اعوان ءَ گوشت کہ جہانگیر خان ترین ءِ پریس کانفرنس ءَ چہ توامیں دروگ آنی نپس سستگ، حکومت ءِ کرا سینیٹ ءُ راجی اسمبلی ءَ گیشی است انت۔ پنجاپ ءُ بنجاھ ءِ بجٹ ءِ منظور کنائینگ ءِ واستہ اچ گیشی وھد پکار نہ بیت۔ گچین کاری ءَ دھاندلی ءِ الزام آناں ٹیکنالوجی ءِ وسیلگ ءَ شکست دیگ لوٹاں، شہباز شریف، یوسف رضا گیلانی ءَ ھوار توامیں اپوزیشن گل آناں دعوت دیاں کہ آ ھم الیکٹرانک ووٹنگ مشین ءِ چار ءُ تپاسی ءَ بگر آں۔ چار شمبے ءِ روچ ءَ پارلیمنٹ گس ءَ بنجاھی وزیر اھوالکاری ءُ شنگ کاری چوہدری فواد حسین ءُ سینیٹر فیصل جاوید ءِ ھمبراھی ءَ الیکٹرانک ووٹنگ مشین ءِ ھوالگ ءَ ھال رسانکی در آناں بریفنگ دیان ءَ آئی ءَ گوشت کہ پاکستان ءِ گچین کاری نظام ءَ را 1977 ءِ کیسز گون انت ایشانی علاج در گیجگ نہ بوتگ، اولی رند ءَ پاکستان تحریک انصاف ءِ حکومت ءَ ٹیکنالوجی ءِ وسیلگ ءَ علاج ساچیتگ، باز دراج بُریں جہد ءُ کوشست ءَ چہ پد اے مشین تیار کنگ بوتگ۔ آئی ءَ گوشت کہ ان اے 249 ءِ حلقہ ءَ استیں سپلیمنٹری الیکشن ءَ دوئیں اپوزیشن گل یکے دومی ءَ را ووٹ دُز ءِ الزام ءَ جنگ ءَ انت، ما مسلم لیگ (ن) ءُ پیپلز پارٹی ءِ ھوار توامیں اپوزیشن گل آناں دعوت دیاں کہ آ اے ماڈل ءَ را بچار انت ءُ اگاں کسے ایشی ءِ سر ءَ جست ءُ پرس کنگ لوٹ ایت گڈا بکنت۔ آئی ءَ گوشت کہ ما ڈن ملک ءَ نندوکیں پاکستانی آناں ووٹ ءِ ھک داتگ، الیکٹرانک ووٹنگ مشین ءِ ھوالگ ءَ کانود ءَ گنجاشک است انت بلے الیکشن کمیشن ءَ را مستری است انت۔ آئی ءَ گوشت کہ انوگ ءَ تاں مئے دیم ءَ پنچ ای وی ایم (EVM) مشین مئے دیم ءَ انت ایشانی تہ ءَ دو درآمدی ءُ سئے ھندی رد ءَ تیار کنگ بوتگ، ایشی پکوئیں پیسلہ الیکشن کمیشن کنت، ما ای وی ایم ءِ وسیلگ ءَ گچین کاری ھرچ ءُ درچ آنی ھوالگ ءَ الیکشن کمیشن ءَ را نمدی نویسیتگ، ھما ایشی ھرچ ءُ درچ ءِ پکوئیں ھساب ءُ داد ءَ جنت۔
