اسلام آباد۔17مئی (اے پی پی): وزیر ءِ تہی کار شیخ رشید احمد ءَ گوشت کہ حکومت ءَ شہباز شریف ءِ نام ای سی ایل ءَ مان کتگ، آ نواز شریف ءَ را واپس آرگ ءِ مٹ ءَ وت شپ ءَ تھاروکی ءَ ملک ءَ چہ تچگ ءَ بوتگ، ایوکیں اپوزیشن انت کہ آ ملک ءَ چہ تچگ ءُ لندن ءَ روگ لوٹ ایت، مزن وزیر عمران خان کامیات بیت، ملک ءَ را ڈکال ءَ چہ کشگ لوٹ ایت، اپوزیشن ھرچی کنگ لوٹ ایت بکنت، پاک فوج گچین بوتگیں جمہوری حکومت ءُ ملک ءِ واستہ ھمگام ءَ اوشتاتگ، اے ھیالانی درشانی آئی ءَ دو شمبے ءَ ادا پریس کانفرنس ءَ گوں گشتانک دیان ءَ کت۔ وزیر ءِ تہی کار ءَ گوشت کہ نیب ءِ سپارش ءِ سر ءَ کابینہ ءِ جھلی کمیٹی ایشی ءِ اندر ءَ وزارت ءِ تہی کار ءُ کانود ءِ وزیر ءُ سیادی داروکیں کارندہ ھوار اتنت۔ ایشاں شہباز شریف ءِ نام ایگزٹ کنٹرول لسٹ ءَ ھوار کنگ ءِ سمری کابینہ ءَ را روان داتگ، ایشی ءَ چہ پد وزارت ءِ تہی کار ءَ آئی ءِ نام ای سی ایل ءَ ھواتر کنگ ءِ نوٹیفیکیشن جاڑی کتگ، وزیر ءِ تہی کار ءَ گوشت کہ شہباز شریف ءِ ھلاپ ءَ نیب ءِ کیس نمبر 22/2020 ٹرائل ءِ سر ءَ انت، کیس چلگ ءَ انت، ھپت7 ارب کلدار ءِ مال ءُ ماڑی آنی کیس انت، اگاں آ نواز شریف ءِ وڑ ءَ ملک ءَ چہ ڈن تتک گڈسا آئی واتر آر سک مشکل بیت۔ آئی ءِ ھاندان ءِ پنچ مردم پیسر ءَ چہ باگی انت ءُ لندن ءَ نشتگ انت، اے کیس ءَ 14 ملزم آنی تہ ءَ 4 سلطانی گواہ جوڑ بوتگ انت۔ اگاں شہباز شریف ءَ را ڈن ءَ روگ بِلاں گڈا آ ریکاٹ ٹیمپر کت کنت ءُ گواہ آناں لگور کت کنت۔ درستاں چہ وشتریں گپ ایش انت کہ آ ئی ءَ وت نواز شریف ءِ واپس آرگ ءِ زامنی داتگ بلے آ وت شپ ءِ تھاروکی ءَ سئور ءِ ٹائم ءَ تچگ ءَ بوتگ۔
