اسلام آباد۔17مئی (اے پی پی): وزیر ءِ درئی کار مخدوم شاہ محمود قریشی ءَ گوں پاکستان ءَ پوسٹیں فلسطین ءِ سفیر احمد جواد امین ربعئی ءَ دو شمبے ءَ وزارت ءِ درئی کار ءَ گند ءُ نند کت۔ درئی کارانی کارگس ءِ رد ءَ گند ءُ نند ءِ ساھت ءَ فلسطین ءَ ایمنی ءُ برجائی ءِ ھرابیں جاور ھال آنی رد ءَ ھیال ریچی کنگ بوت۔ وزیر ءِ درئی کار ءَ گوشت کہ کودکیں فلسطینی آنی سر ءَ اسرائیلی کشاں چیل ءِ سر ءَ سک باز مذمت گراں۔ وزیر ءِ درئی کار ءَ کودکیں فلسطینی آنی شہید بوھگ ءِ پد ءَ فلسطینی سفیر آں گوں دلپدردی ءِ درشان کت ءُ گوشت کہ فلسطین ءِ سر ءَ اسرائیلی کشاں چیل ءَ را گر ءُ دارگ کنگ ءِ وستہ ارزشتی ایں مسلمانیں ملک ءُ میاں اوستمانی برات آنی گوما روگ ءُ آیگ ءَ جاڑی داشتگ۔ مزن وزیر عمران خان ءَ فلسطینی صدر محمود عباس ءُ منی فلسطینی وزیر ءِ درئی کار ءَ گوں رابطہ کتگ ءُ آواناں ، وت واجئی ھک ءِ شوہازگ ءَ پاکستان ءِ سرجمیں کمک کنگ ءِ دل یکیمی کنائینت۔ فلسطینی سفیر ءَ اے سکیں ساھت ءَ پاکستان ءِ نیمگ ءَ گیشاں چہ گیش کمک ءُ یکوئی ءِ دررشان کنگ ءِ پد ءَ وزیر ءِ درئی کار ءِ شگر ءُ منت گپت۔ فلسطینی سفیر ءَ فلسطین ءَ جاڑیگیں کشاں چیل ءِ ھلاسی ءُ کمی آرگ ءِ واستہ مزن وزیر عمران خان ءُ وزیر ءِ درئی کار ءِ سفارتی کوشست آناں ساڑات۔
