اسلام آباد۔16مئی (اے پی پی):وزیر درئی کار مٰخدوم شاہ محمود قریشی ءَ یونائیٹڈ نیشن ءُ او آئی سی ءِ منوگری آنی رد ءَ فلسطین ءِ جیڈھ ءَ را دو رریاستی گیواری کنگ ءِ جزم ءِ درشان کت ءُ گوشت کہ فلسطین ءِ جیڈھ ءِ گیواری ءَ ابید بنی آنی شرپ ءُ ازت نا سرجم انت بلکینگ ءَ دمگی ایمنی اچ رنگ ءَ بوت نہ کنت ءُ میاں اوستمانی سلامتی بیم آں گوں دچار کپ ایت۔ میاں اوستمانی برات فلسطینی آنی ھلاپ ءَ گیر کانودی کارمردی ءُ بنی آدمی ھل آنی لگت مالی ءَ را زوت بدار ایت، فلسطینی آنی رکھینگ ءَ را دل جم جوڑ بکنت ءُ اسرائیلی ظلم ءُ زوراکی آنی دارگ ءِ واستہ مھکمیں گامگیج بکنت۔ یک شمبے ءِ روچ ءَ فلسطین ءِ ھلاپ ءَ اسرائیل ءِ جنگ ءُ چوپ آنی ھوالگ ءَ برجم داشتگیں او آئی سی ءِ ایگزیکٹو کمیٹی ءِ ایمرجنسی دیوان ءَ گوں ورچوئل گشتانک ءَ وزیر ءِ درئی کار ءَ گوشت کہ فلسطینی آنی کمک ءُ برجائی ءَ چہ پاکستانی ءِ درئی پالیشی ءِ یک تچک ءُ سہرائیں رھبند بوتگ۔ آئی ءَ گوشت کہ قائداعظم محمد علی جناح بندات ءَ چہ فلسطینی الس ءِ جائزیں ھک آنی منوک بوتگ۔ آئی ءَ گوشت کہ مارا اے سکیں ساھت ءَ فلسطینی الس ءِ گوما ھمبراھ داری کنگی انت۔
