ملتان ۔13مئی (اے پی پی): دری کارانی وزیرمخدوم شاہ محمود قریشی ءَگشتگ کہ پاکستانی راج کشمیر ءُ فلسطین ءِ جیڑہ ءَ سر ءَ تپاک اَنت۔ فلسطین ءِ جیڑہ ءِ سرءَ مسلم امہ ءَ گوں شور ءُ صلہ ءِ تپاکی ءَ پد پاکستان ءُ ترکی ءَ اقوام متحدہ ءِ جنرل اسمبلی ءِ دیوا ن توار کنگ ءِ ھاترءَ تحریک پیش کنگ ءِ فیصلہ کتگ۔ اے ھیالانی درشانی آئی ءَ پنچ شمبے ءِ روچءَملتان ءَ واجہ بہائوالدین زکریاملتانی ءِ دربار ءَ ائید ءِ نماز ءَ وانگ ءَ پد گوں میڈیا ءَ گپ ءُ تران کنان ءَ کتگ۔ دری کارانی وزیر شاہ محمود قریشی ءَگشتگ کہ اولی قبلہ ءِ سرءَ اسرائیل ءَ گوں دردی ءَ اُرش کتگ، معصومیں نمازی شہید کنگ بوتگ اَنت۔ اے نازرکیں جیڑہ ءِ سرءَ مزن وزیر ءَ سعودی عرب ءِ شاہ سلمان ءُ ترک صدر طیب اردگان ءَ گوں گپ ءُ تران کتگ۔ آئی ءَ گشتگ کہ مئے کوشست اِنت کہ او آئی سی ءِ وزارتی دیوان توار کنگ بہ بیت ءُ 57 مسلم ملک یکجاہ کنگ بہ بنت ءُ فلسطین ءِ جیڑہ ءَ را اقوام متحدہ ءِ جنرل اسمبلی ءَ برگ ءُ پیش کنگ بہ بیت۔ دری کارانی وزیر ءَ گشتگ کہ کشمیر ءُ فلسطین ءِ جیڑہ ءِ سرءَ پاکستانی راج مدام تپاک بوتگ۔ مرچی ہمے تپاکی ءِ ضلورت اِنت۔ ما امہ ءِ تہا بر ءُبانگ ءِ کوشستاں ناکام کنگ ءَ سوبمند بوتگ اَنت۔ آئی ءَ گشتگ کہ یمن ءِ جیڑہ ءِ سرءَ امریکہ ءِ نوکیں انتظامیہ ءِ لیکہ ءِ تہا مٹی اَتکگ۔ سعودی عرب ءُ پاکستان چکاسیتگیں سنتگ ءُ ہمراہ اَنت ما یکجاہ ہوار کار کناں۔ آئی ءَ راج ءَ را ائید ءِ مراد بات داتگ ءُ گشتگ کہ آیوکیں دو ہفتگ باز حاس اَنت کورونا وائرس ءَ را گرءُ دارکنگ ءِ ھاترءَ راج پرہیز بہ کنت۔
