ملتان۔ 12مئی (اے پی پی) وزیر خارجہ مخدوم شاہ محمود قریشی پارینے کہ وزیراعظم نا سعودی عرب نا ساڑی آ دورہ غان مخالف آتا اومیت آتے دِیر درے، گڑاس زموار سعودی عرب تون تعلقداری تے خراب کننگ خوارہ، وزیراعظم نا دورہ غان خلیج ودی کروک آتا ارمان تے دِیردرے۔ داخیالآتا درشانی ءِ او چارشنبے نادے آ ملتان اٹی میڈیا تون گپ و تران اٹی کرے۔ شاہ محمود قریشی پارے کہ سعودی ولی عہد محمد بن سلمان نا سلہ غا نن سعودی عرب نا مسہ دے ئی دورہ ءِ کرین، دورہ سعودی عرب اہم باندات آ گپ وتران نا مسہ دور مس۔ محمد بن سلمان و عمران خان نا نیام اٹ مون پہ مون اوڑدہی ہم مس۔ اومستی پارے کہ سعودی عرب تون پنچ معاہدہ مسنے، سعودی پاکستان اسٹریٹجک سپریم کونسل ءِ جوڑ کننگا، کونسل نا کمک اٹ چندی بشخ آتے ٹی کمکاری ءِ مون آ دننگک۔ سعودی عرب توانائی نا بشخ اٹی پاکستان نا کمک ءِ کیک۔ اوپارے کہ سعودی وزیر خارجہ کم آن کم اِرادے اکن پاکستان آ بریک۔ وزیراعظم عمران خان دورہ ٹی اسلامی سروک کانفرنس تنظیم نا سیکرٹری جنرل تون ہم اوڑدہی کرے و اوڑتون فلسطین ناحالیت آتیا گپ وتران کننگا۔ اوپارے کہ ننے فلسطین نا معاملہ غا بھاز گڑتی ءِ، غٹ مسلم ملک آک فلسطین کن توار بڑزکیرتو اوڑآن پرخ تمک، بیرہ جلوس کشنگ آن ہچ اس دُوبفک، غٹ مسلم ملک آتے یکجا مروئی تمک۔ شاہ محمو دقریشی پارے کہ سویلی پنجاب سیکرٹریٹ نا بنداو بھلو گام اسے، وزیراعظم ملتان ضلع کن 30ارب نا پیکج نا پڑو کرے، وخت ضرور لگک ولے سویلی پنجاب نا شار تیٹی بدلی بریک۔ اوپارے کہ کرپشن نا چٹفنگ کن حکومت تون اوار غٹ ادارہ غاک تینا کڑد ءِ اداکیر۔ شاہ محمود قریشی مستی پارے کہ مسکوہی وزیر اعظم نواز شریف ءِ درمان نا غرض اٹ پیشن نا ملک آ ہِننگ نا ہراتم موکل تننگاسس تو عدالت ءِ شہباز شریف گارنٹی تسوسس کہ نواز شریف درمان آن پد پدی بریک۔ اوپارے کہ نوازشریف غٹ سیاسی سرجزآتے ٹی شریک ءِ۔ ہرانگ ہنا شہباز شریف نا گارنٹی۔ اگہ شہباز شریف ہم ہنا تو ننے آ مک مکا دوبہ لگک۔ ننا حکومت کس اس تون مک مکا کن تیار اف۔
