اسلام آباد۔ 11مئی (اے پی پی) وزیراعظم عمران خان پارینے کہ ہرجاگہ غامافیاک تولوک ءُ ہرا بدلی اتنگ کن الیپننگ ءُ، کرپٹ نظام آن فائدہ ہرفنگ آ 30سال اسکان ملک ءِ پلوک آ ہروڑنا چم آتے کاریم اٹ اتنگ ءُ، قوم کنتون تفے مافیا تا مقابلہ ءِ کرسا نشان ایتیوہ، زوراور ءِ کانود آن شیف اتنگ جہاد ءِ، کنا حکومت کائے این آر او تفرہ، شہباز شریف ملک آن پیشن نرنگ نا کوشست کننگ ءِ، وزیر خزانہ ءِ کبینی ءِ کم کننگ نا ٹاسک تسونن، ڈیہہ نا ایلو ملک آتا نسبت پاکستان اٹی نہاد آک کم ءُ، پاکستان اٹی عدلیہ آزاد ءِ، خلیس انت ہیت اناسے، عدالت آتیا بریر تینا سفائی ءِ پیش کیر، این آر او نا انتظار اٹ پیشن انت اکن ہنانو توسنو، بزغرآک شونہال مسنو، کشاری اصلاحات کننگ اُن، بزغرکارڈ درستی راستی کرفنگ اُن، جانجوڑی کارڈ آن ملک اٹی انقلا ب اس بریک۔ داخیال آتا درشانی ءِ او سے شنبے نا دے آ پی ٹی وی آ ”نما وزیراعظم نم تون اوار“ پروگرام اٹ الس نا براہ راست سوج آتا ورندی ءِ ترسا کرے۔ وزیراعظم عمران خان پارے کہ کورونا نا اولیکو و ارٹ میکو ریسہ ٹی قوم کمک کرے و مسٹ میکو ریسہ ٹی ہم اللہ نا فضل و کرم اٹ و خوش بختی اٹ ڈیہہ نا ایلو ملک آتا نسبت ننا حالیت بھاز جوانءِ، بھارت اٹی کورونا غان ودی مروک آ حالیت آتا سوب 22کروڑ مخلوق نیزگاری نا لکیر آن شیف ہنانو ولے پاکستان الحمداللہ داحالیت آتے ٹی بھارت، بنگلہ دیش، نیپال و ایران تون اوار ڈیہہ نا ایلو ملک آتا نسبت حالیت گچین ءِ۔ وزیراعظم قوم ءِ پنت و شون کرے کہ او عئید انا چھٹی تیٹی خاص وڑاٹ احتیاط اٹ کاریم ہلیر و تینا و تینا بھلا تا خیال ءِ تخر انتئے کہ ہم اخس احتیاط کرون ہموخہ زوت دادین انا مون ءِ تورون۔ اوپارے کہ بھارت اٹی ہسپتال ناجوڑ آتیان پُرتموک ءُ، آکسیجن نا کمتی و بھلوکچ اسے ٹی زوال مننگ ءِ ولے پاکستان اٹی کیس آک ترندی اٹ ودیپننگ ءُ۔اوپارے کہ الس ایس او پی تیا عمل کے و ماسک ضرور خلے۔ ماسک خلنگ آن کورونا نا خطرہ ءِ 50 درسد کم کننگ مریک، خاص وڑاٹ بند و مچی والا جاگہ غاتیا ماسک ضرور خلیر انتئے کہ اگہ حالیت آتا خراب مننگ نا سوب آن لاک ڈاؤن کروئی تما تو چھابڑی، ریڑھی والا و دیہاڑی کروک بھاز زہمی مریرہ۔ وزیراعظم پار کہ اگہ نن احتیاط کرین تو مسٹ میکوریسہ آن ہم جوانی اٹ پیش تمنہ۔ مالاکنڈآن اسہ شاری اسے نا سوج انا ورندی ءِ ترسا وزیراعظم پارے کہ 25سال مست ہراتم ای پی ٹی آئی ءِ جوڑ کریسٹ تو کنتون شہرت، پیسہ ہرگڑائس و کنے ہچ ءُ کاریم اس کننگ نا گرج الوکہ ولے ای سیاست اٹ داخاطرآن بسوٹ تانکہ ای ملک اٹ انصاف نا نظام کن جہد کیو۔
