کوئٹہ۔ 11 مئی (اے پی پی) ڈپٹی اسپیکر قومی اسمبلی قاسم خان سوری پارینے کہ بلوچستان حکومت نا نیام اٹ اختلاف وقتی ءِ ہرادے زوت ایسر کننگک، بھارت اوغانستان نا امن مذاکرات ءِ سرسہب مننگ خواپک ہرانا سوب آن او داڑے دہشت گردی کرفنگ ءِ، کورونا دین انا سوب آن لاک ڈاؤن خلنگ بیوسی ءِ۔ داپوریاگر آتا آخا بلکن الس نا جان نا ویل ءِ ہراڑآ سمجھوتہ کننگ کپنہ۔ داہیت ءِ او سے شنبے نادے آ سول ہسپتال کوئٹہ، بی ایم سی ہسپتال و فاطمہ جناح ہسپتال کوئٹہ نا کورونا دین وارڈز و ویکسی نیشن سینٹر آتادورہ ءِ کننگ نا وخت آ میڈیا تون گپ وتران کرسا پارے۔ داوخت آ سول ہسپتال کوئٹہ نا ایم ایس ڈاکٹر ارباب کامران کاسی، بی ایم سی نا ایم ایس ڈاکٹرکمالان گچکی، ایم ایس فاطمہ جناح ہسپتال ڈاکٹر نوراللہ موسیٰ خیال ئسک ہم ساڑی ئسر۔ ڈپٹی اسپیکر قاسم خان سوری پارے کہ پاکستان اوغانستان امن مذاکرات اٹ گچین کڑد ادا کننگ ءِ ہرانا سوب آن ہندوستان خواپک کہ دا مذاکرات سرسہب مرے۔ بھارت براہ راست بلوچستان اٹی دہشت گردی نا واقعہ غاتے ٹی اوار ءِ ساڑی آ دے تیٹی سیکورٹی فورس آتیا جلہوآتا مذمت ءِ کینہ۔ اوپارے کہ اوغانستان نا امن مذاکرات نا سرسہبی کن پاکستان ہروڑاٹ کڑد ادا کیک ولے دشمن ملک آک امن مذاکرات ءِ لتاڑنگ خوارہ ولے نن اوفتے سرسہب مننگ کن الیپنہ۔ اوپارے کہ حکومت آتے ٹی اختلاف مریک وزیراعظم عمران خان دورہ کوئٹہ نا وخت آ وزیراعلیٰ و پی ٹی آئی نا اسمبلی نا باسک آتون سرجم اوڑدہی و اوفتا ویل آتے بنگ زوت غٹ گڑتی تے اواری اٹ تولسا ایسرکننگک۔ اوپارے کہ ویل ہراُراٹی مریک ہرادے ہیت وگپ انا کمک اٹ ایسر کننگک۔ قاسم خان سوری پارے کہ ڈاکٹرز، پیرامیڈیکل اسٹاف و نرس آک تینا جان تا پرواہ ءِ کننگ آن بیدس کورونا دین آن بچنگ کن برسرپیکار ءُ کورونا دین انا مسٹ میکو ریسہ ہراترندی اٹ ودنگ ءِ ننے خیال کننگ نا گرج ءِ،بھارت اٹی دے اٹی 4 لکھ انا خڑک کیس رپورٹ مننگ ءِ ہموڑے نرینہ غاتا آخیری رسم آتے ادا کننگ نا جاگہ کم مسنے آکسیجن نا بدترین تنکی ءِ حکومت خواپک کہ پاکستان اٹی داوڑ ءُ وخت اس برے ہراڑکن سخت رکھی گام گیج کننگ انگ ءِ۔ اوپارے کہ الس اُراتیٹی مریر و احتیاط کیر عئید آ بے گرج وڑاٹ اُراتیان پیش تمپس۔ اوپارے کہ 8 آن 16مئی اسکان لاک ڈاؤن عائد کننگانے داڑآ عملدرآمد المی ءِ۔
