پشاور۔ 11 مئی (اے پی پی) وزیراعلیٰ خیبرپختونخوا محمود خان اناگت صوبائی دارالحکومت پشاور نا چندی علاقہ غاتا دورہ ءِ کرے۔ وزیراعلیٰ بیدس سیکورٹی پروٹوکول یونیورسٹی روڈ، کینٹ، سٹی، جی ٹی روڈ آن بیدس پبی نا ہم دورہ ءِ کرے و کورونا ایس او پی تیا عملدرآمد، ٹریفک نا ہن و بر و سفائی و ستھرائی نا حالیت آتا جاچ ءِ ہلک۔ وزیراعلیٰ گڑاس ہند آتیا کورونا ایس ا وپی تیا عملدرآمد نا حالیت آتیا است جم مفننگ نا درشانی ءِ کرسا ضلعی انتظامیہ و پولیس ءِ ایس او پی تیا سختی اٹ عملدرآمد ءِ پک کننگ نا پارت کرے۔ اوپارے کہ کورونا دین انا تالانی ءِ توننگ کن ایس او پی و حکومتی پرمان تیا عملدرآمد المی ءِ ہنداخاطرآن انتظامیہ دا ایس او پی تیا سختی اٹ عملدرآمد ءِ پک کے و خلاف ورزی کروک آتا برخلاف کانودی کارروائی کننگے۔ وزیراعلیٰ جی ٹی روڈ انا گڑاس ہند آتا سفائی نا حالیت آتیا ہم است جم مفننگ نا درشانی ءِ کرسا ڈپٹی کمشنر پشاور ءِ وارننگ ترسا سفائی نا حالیت آتے دمدستی وڑاٹ جوان کننگ نا پارت کرے۔ پبی دنگ اٹ جی ٹی روڈ انا چارمہ کنڈ گندگی نا ڈھیر و سفائی نا ہیبدار حالیت آتیا ترندی نا درشانی ءِ کرسا وزیراعلیٰ تعلقدار ٹی ایم او ءِ عئید آن مست مہالو گندگی تے اسہ کنڈ کننگ و سفائی نا حالیت آتے است جم کننگ کن المی گام گیج آتا پارت کرے و پارے کہ ایلو دروشم اٹ اوفتا برخلاف کارروائی کننگک۔ جی ٹی روڈ آ گرین بیلٹ انا مخدوش حالیت آتیا او نیشنل ہائی وے اتھارٹی و تعلقدار ٹی ایم او ءِ گرین بیلٹ نا بحالی کن دمدستی گام گیج آتا پارت کرے۔ داکان بیدس وزیراعلیٰ پبی پولیس اسٹیشن نا ہم اناگت دورہ ءِ کرسا تھانہ نا ریکارڈ ءِ چیک کرے و تھانہ نا چندی بشخ آتا معائنہ ءِ کرے۔ وزیراعلیٰ حوالاتی تتون ملا و اوفتیان پولیس نا رویہ نا بارواٹ معلومداری ہلک۔ تھانہ ٹی سفائی نا ہیبدار حالیت آتیا تعلقدار ایس ایچ او ءِ وارننگ ترسا سفائی نا حالیت آتے گچین کننگ وخت اس کہ تھانہ نا دنگ اٹ مال مقدمہ نا گاڈی تا سہی ریکارڈ ءِ تخنگ نا پارت کرے۔ شار انا گڑاس ہند آتیا بے ہنگم ٹریفک نا حالیت آتا نوٹس ءِ ہلسا وزیراعلیٰ ڈی آئی جی ٹریفک ءِ شار انا اختہ ہند آتیا ودکی ٹریفک پولیس کارندہ غاتا ڈیوٹی خلنگ تون اوار ٹریفک ءِ جوان وڑاٹ چلیفنگ کن ایلو المی گام گیج ہرفنگ نا پارت کرے۔
