اسلام آباد۔ 11 مئی (اے پی پی) بنجائی وزیر حوالکاری و شینکاری چوہدری فوا د حسین پارینے کہ حدیبیہ پیپر ملز کیس کم و ود 1242ملین روپئی نا فراڈ نا کسہ ءِ ہرا بالحاظ حجم پاناما پیپرز کیس آن بھلن ءِ و دانا بناء2000ء ٹی ہمووخت آ مس ہراتم نیب کمامدارآک حدیبیہ پیپرز نا برخلاف اسہ ریفرنس اس دائر کریر، نواز شریف نا ہڑتوم آ مارک حسن و حسین نواز، شہباز شریف و اونا سیاسی وارث حمزہ شہباز ہم دا کیس انا مرکزی کڑد ءُ، دامقدمہ ٹی گڑاس پوسکن ءُ راستکی مون آ بسنے ہراڑآ پوسکن جاست وپاست نا فیصلہ ءِ کننگانے، انصاف نا خواست ءِ کہ غٹ ادارہ غاک تینا کڑد ءِ ادا کیر، پاکستان نا آخبت کانود نا حکمرانی تون وابستہ ءِ۔ سے شنبے نادے آ حدیبیہ پیپرز ملز انا برخلاف کیس انا سرجم آتے جاری کرسا تینا بیان اٹی بنجائی وزیر حوالکاری و شینکاری چوہدری فواد حسینپارے کہ اسحاق ڈار دا فراڈ اٹی شریف خاہوت نا کمکاری کن فارن کرنسی نا جعلی بے نامی اکاؤنٹ ملفے۔ ہلنگ آ اسحاق ڈار وعدہ معاف گواہ جوڑ مس و او تعلقدار کمامدارآتے تینا سرجم بیان ءِ ہم ریکارڈ کرفے ولے اوکان پد دا پارسا اوڑآن دا بیان ءِ زبردستی اٹ ہلنگا، تینا بیان آن چپ مس، بنجائی وزیر پارے کہ دافراڈ اکن بھاز جوان ءُ وڑوڈول اس اختیار کننگا، حدیبیہ پیپر ملز پرائیویٹ لمیٹڈ نا ریکارڈ نا پڑتال اٹی نیب اسلام آباد نا جاست وپاست کارآتیا دا انکشاف مس کہ 1996-97ء و 11997-98ء ٹی کمپنی نا کھاتہ غاتے ٹی بالترتیب30.499ملین و 612.273ملین روپئی بطور شیئر ڈیپازٹ ظاہر کننگانے۔ ہمو کمپنی ہرانا دازرکاری آن مست کچ بیرہ 95.7ملین و جم نسخان 809.834ملین روپئی ئس، اٹی داخہ در بھلو زر اسے نا جاست وپاست کروک آتے گڑتی ٹی اختہ کرے۔ چنانچہ نیب 1999ء نا نیب آرڈیننس نا رداٹ معاملہ نا پڑتال نا پرمان تس۔ جاست وپاست آن سما تما کہ ملز انتظامیہ ہر میاں محمد شریف، شمیم اختر، نواز شریف، شہباز شریف، عباس شریف، مریم صفدر، صبیحہ عباس، حسین نواز و حمزہ شہباز آ تالان ءِ، نا تجوری تیٹی بھلو غیر کانودی زرا س ساڑی ء، و او دادولت نا کٹنگ نا ذریعہ ءِ پاننگ اٹی افس۔ دافک منی لانڈرنگ کن 1992ء نا دی پروٹیکشن آف اکنامک ریفارمز ایکٹ نا چندی شق آتا سیبو ءِ ہلسا درواٹ فارن کرنسی نا چندی جعلی اکاؤنٹ ملفیر و بھاز انگا دولت ءِ دا کھاتہ غاتے ٹی جمع کرفیر۔ ہراتم دا جعلی اکاؤنٹ آتا پت پاش مس تو اوفک دا پیسہ غاتے حدیبیہ پیپرملز انااکاؤنٹ آتے ٹی داوڑ براہ راست شاغنگ نا فیصلہ ءِ کریر، دامسخت کن اوفک دا مل انا اکاؤنٹ آتے کن دا پیشن نا کرنسی نا مالیت نا بریبر چندی ڈالٹر ٹیلی گرافک ٹرانسفرز(ٹی ٹیز) نا بست وبند کریر۔ اسل ہمووڑ دن کہ داسہ شہباز شریف و مریم نواز نا زر آتے پاکستان آن پیشن گدریفنگا۔ 1242.732ملین روپئی اناگت شریفخاہوت نا میرات آتے ٹی بسر و دا زر پاناما اسکینڈل آن ہم زیات ئسر۔ نیب دا ہم پیدواری کرے کہ ہندا واردات نا کمک اٹ شریف خاہوت نا ہمو پندار بندغ آک منی لانڈرنگ و میرات آتے ڈکھنگ کون آ گناہ ءِ کتور بلکن دابھاز انگا ریاستی و حکومتی ادارہ غاتون درو کننگ نا ہم مرتکب مسنو۔ مشرف دور اٹی ہراتم دا معاملہ احتسا ب عدالت نا مون پہ مون بس کیس اٹی شریف خاہوت مشرف حکومت تون ڈیل کرے و سعودی عرب آ ہنا۔ 2008-09اٹی معاملہ ءِ دُوار ہرفنگا ولے پیپلزپارٹی و نون لیگ نا کیس ءِ ولدار تورفیر۔ پاننگاکیس چلینگ مفک، چیئرمین نیب انا دستخط اف۔ شریف خاہوت کارروائی ءِ لاہور ہائی کورٹ نا مون پہ مون چیلنج کرے تو اِراباسکی ڈویژن بنچ 1,1آن منقسم ءُ فیصلہ اس بنفے۔ ہنداوڑ معاملہ ریفری جج آ ہنا ہرامقدمہ نا بندش نا فیصلہ ءِ کروک آ ڈویژن بنچ انا جج اناسلاہ نا مخ تفی ٹی فیصلہ تس و مقدمہ 2014ء ٹی بند کننگا۔
