اسلام آباد۔ 11 مئی (اے پی پی) وزیر خارجہ مخدوم شاہ محمود قریشی پارینے کہ پاکستان بھارت تون مذاکرات کن تیار ءِ، بھارت داڑکن کشمیری تا تشخص ءِ چٹفنگ نا گام گیج آتے پدی ہلسا سازگار ماحول اس جوڑکے، وزیر اعظم نا سعودی عرب نا دورہ غیر معمولی نوعیت نائس۔پاکستان اسہ وتواجہ، پرامن و سوگو اوغانستان نا خواہندار ءِ ہرا پاکستان نا فائدہ ٹی ءِ، فلسطین نا ویل آ امت مسلمہ ءِ یکجا مروئی مریک، کشمیر جہانی کہول آ امنا مروک جھیڑہ اسے داڑآ ہچ ءُ شک اس اف پاکستان تینا موقف آ سلوک ءِ۔ سے شنبے نادے آ وزارت خارجہ ٹی پریس کانفرنس آن تران کرسا وزیر خارجہ پارے کہ قبلہ ء اول مسجد اقصیٰ ٹی ہرابربریت مننگ ءِ اوڑآ ننے بھاز گڑتی ءِ، وزیراعظم عمران خان سعودی عرب اٹی سیکرٹری جنرل و اوآئی سی تون اوڑدہی ٹی دابابت پاکستان نا گڑتی آن معلومدار کرے۔ ترک وزیر خارجہ سعودی عرب اٹی سعودی کمامدارآتون دابابت ہیت وگپ کیک، فلسطین نا معاملہ غا پاکستان نا ترکی آنبار پبی موقف ءِ، ترک وزیر خارجہ او آئی سی نا وزارتی کہول آ ہلہلہ ئی دیوان ءِ بٹنگ نا بابت ہیت کیک، بیست ءُ ہفت می نن کودک مخلوق ءِ اقصیٰ مسیت اٹ بیدادی نا شست کننگا، اوفتیا گرینڈ آتے اٹ و ربڑبلٹ آتے اٹ جلہو کننگا، پاکستان دا بربریت نا ترندی اٹ مذمت ءِ کیک، پاکستان فلسطینی تتون پورو یکجہتی نا درشانی ءِ کیک، کودک شارتیا جلہو نا موکل ہراکانود ایتک۔ کنا تدوک آ نن وزیراعظم عمران خان تون ہم ہیت مس و اودے ہم ای پت اٹی ہلکوٹ، مننگ کیک کہ او ہم داڑآ ہیت کے۔ جرمنی ایران، اردن و بھاز انگا ملک آک دابابت تینا گڑتی تا درشانی ءِ کرینو۔ اوپارے کہ داحالیت آتے ٹی مست آنبار اتنگ کن اقوام متحدہ نا سلامتی کونسل نا دیوان ءِ بٹنگ نا گرج ءِ، جہانی برادری الشیخ الجراہ نا واقعہ غاتیان غافل مننگ کپک، نن ہموڑے تصادم نا حق اٹی افن ولے کودک مخلوق ءِ ہچ ءُ حالیت اسے ٹی شست کننگپ۔ پاکستان نا داڑآ پوزیشن بھاز پیدوار ءِ۔ اوپارے کہ وزیراعظم عمران خان نا دورہ سعودی عرب غیرمعمولی نوعیت نا ئس، ولی عہد شہزادہ محمد بن سلمان تینٹ وزیراعظم ءِ بخیر اٹ پاننگ کن بالی پٹ آ بس، ننا سعودی عرب تون گچین تعلقداری ءِ ہرادے دا دورہ پوسکن ءُ جہت اس تس، دادورہ ٹی پاکستان و سعودی عرب نا نیام اٹ اسہ ادارہ جاتی میکنزم اس جوڑ مسنے۔ دا ادارہ جاتی میکنزم نا خدوخال ءِ نن طے کرینن، دانا مسہ تمبہ ءُ دافتے ٹی دفاع و اسلامتی، زرگزران و دودوربیدگ و مثبت ساکھ اٹ دیر اس کماشی ءِ کیک دا طے مس۔بیروزگاری ننکن بھاز بھلو چیلنج اسے، سعودی ولی عہد نا وژن 2030ء نا رداٹ اودے پین ورک فورس انا گرج مریک۔ بروک آ منہ سال اٹی اودے 10 ملین افرادی قوت درکار مریک و او پاکستان آن خاصی کچ اس ہلنگ نا خواہندار ءِ، داڑکن ننے ڈٹ بندی اس کروئی مریک تانکہ بیرہ مزور تپہ آخا بلکن اہم ملازمت آتا دوئی کننگ ہم ممکن مرے۔ سعودی عرب نا دورہ ٹی پنچ ایم او یو تیا دستخط مس، اِرا معاہدہ وزارت داخلہ تون تعلقدار ءُ۔ ہائیڈرو پاور، انفراسٹرکچر و گیگ بدل توانائی کن ننے سعودی فنڈ آن 500 ملین ڈالر نا زر فراوان کیک۔
