اسلام آباد۔ 10 مئی (اے پی پی) وزیراعظم نا سلاہکار واپار و زرکاری عبدالرزاق داؤد پارینے کہ پاکستان تینا ہمسایہ ملک اوغانستان و نیامی ایشیائی ریاست آتون واپاری تعلقداری تے ودفنگ خواہک۔ بلوم برگ ءِ انٹرویو ترسا اوپارے کہ نن دنیا تون واپار ءِ ودفنگ خوانہ، واپاری شریدار آتے ٹی ودکی کن پاکستان خاص وڑاٹ تینا نیامی ایشیائی ریاست آتون واپاری تعلقداری تے مون آ دننگ خواہک۔ اوپارے کہ اوغانستان تون جون اٹی پوسکن آ واپاری معاہدہ ءِ حتمی دروشم اس تننگک۔ پاکستان اوغانستان نا کسر نیامی ایشیائی ریاست آتون واپاری تعلقداری تے ودفنگ خواہک۔ عبدالرزاق داؤد پارے کہ داوخت آ واپار نا بابت پاکستان قطبی امریکہ،یورپییونین و چین اتون اوار منہ ملک آتون محدود ءِ۔ ولے دنیا داکان کیہی زیات بھلنءِ۔ نن ایلو ملک آتون ہم واپار اٹی ودکی خوانہ۔ اوپارے کہ ازبکستان، تاجکستان، ترکمانستان، کرغزستان، و قزاخستان تون داوخت آ پاکستان نا واپار اسہ ارب ڈالر آن کم ءِ، نن دا ملک آتون واپار ءِ یک و نیم ارب ڈالر اسکان دننگ خوانہ۔
