جدہ۔9مئی (اے پی پی):پاکستان ءُ سعودی عرب ءَ وتی دو نیمگی سیاسی، معاشی، تجارتی ، دیمپانی ءُ سلامتی یکوئی آناں گیش برجم کنگ ءِ سر ءَ تپاکی کنان ءَ پاکستان ءَ سعودی سرمایہ کاری، ھاٹیگ ءِ شوبگ ءَ کمک ءُ سعودی عرب ءَ پاکستانی آنی واستہ روزگار ءِ موہ آناں گیش کنگ ءِ سر ءَ ھاسیں زور داتگ، سعودی شہزادہ ءَ اوگان ایمنی کار ءَ پاکستان ءِ کمکار ی کرد ءَ را ساڑاتگ ءُ اوگان پریک آنی سر ءَ زور پر داتگ کہ اوگانستان ءِ جیڈھ ءَ را سیاسی رنگ ءَ گیوری ءِ بہ بیت، پاکستان ءُ سعودی عرب ءَ پراھ ءُ شاھیگانیں سیتی فورمز آنی سر ءَ یک ءِدومیگ ءِ کمک ءَ را جاڑی دارگ ءِ ھوالگ ءَ تپاک کت۔ مزن وزیر عمران خان ءَ سعودی عرب ءِ ولی ، نائب مزن وزیر ءُ دیمپانی ءِوزیر ءِ داتگیں دعوت ءِ پد ءَ 7 ءَ بگر تاں 9 مئی ، اسلامی سالروچ ءِرد ءَ 25 رمضان شریف ءَ بگر تاں 27 رمضان شریف 1442 ہجری ءَ سعودی عرب ءِ سرکاری تر ءُ تاب کت۔ جاڑی کتگیں جار ءِ رد ءَ سعودی ولی شہزادہ محمد بن سلمان ءَ مزن وزیر ءَ را وت اتک کتگ۔ تر ءُ تاب ءِ ساھت ءَ مزن وزیر ءُ آئی ءِ ڈل ءَ را سعودی ولی ءُ ڈلی تک ءَ جتا جتائیں گند ءُ نند ءُ منوگری آنی ھوالگ ءَ جاڑی کتگیں جار آنی تہ ءَ گوشت کہ کہ دوئیں سروک آں سعودی عرب ءُ پاکستان ءِ تاریخی ءُ دود ءُ ربیدگی ءُ یکوئی براتی آناں گیش مھکم کنگ ءِ جزم ءِ درشان کتگ۔ مزن وزیر عمران خان ءَ مسلمان آنی یکوئی ءُ اسلامی دگنیا ءِ استیں جیدھ آنی گیواری ءِ واستہ سعودی عرب ءِ پازیٹیو کرد ءِ گوما دمگی ایمنی ءُ سلامتی ءِ و استہ سعودی عرب ءِ کوشست آنی رچ ءَ خادم حرمین الشریفین شاہ سلمان بند عبدالعزیز ءِ جوانیں سروکی کرد ءَ را ساڑات۔ مزن وزیر ءَ 2018 ءُ 2019 ءَ وتی سعودی عرب ءِ تر ءُ تاب ءُ سعودی عرب ءِ ولی عہد ءُ نائب مزن وزیر ءُ نائب وزیر ءِ دیمپانی ءِ فروری 2019 ءَ پاکستان ءِ تاریخی تر ءُ تاب ءِتران کت ایشی ءِ تہ ءَ دوئین آں یک ءِ دومیگ ءَ گوں یکوئی ءُ دوئیں ملک آنی سیت ءُ دو نیمگی کمک آناں گیش دیمروئی ءِ واستہ سعودی پاکستانی سپریم کوآرڈینیشن کونسل ءِ برجائی ءِ جار جتگ ات۔ سعودی ولی عہد ءَ پاکستان ءَ را یک نوکیں دیمروئی کنوکیں ءُ گہبودی ریاست ءِ تہ ءَ مٹ کنگ ءِ واستہ مزن وزیر پاکستان ءِ ویژن ءَ را سعودی عرب ءِ نیمگ ءَ یک شل ءَ کمک کنگ ءِ دل یکیمی کنائینت۔ دوئیں پریک آں سعودی عرب ءِ ویژن 2030 ءُ پاکستان ءِ جیوپالیٹکس ءَ چہ جیو اکنامکس ءِ تہ ءَ ٹرانسفر بوھگ ءِ واستہ دیمروئی کار آنی تہ ءَ سرمایہ کاری ءُ موہ آنی پت ءُ پول کنگ ءَ اقتصادی ءُ تجارتی یکوئی آناں گیش برجم کنگ ءِ کار رپک آنی سر ءَ ھیال ریچی کت۔ مزن وزیر ءَ خادم حرمین شریفین شاہ سلمان بن عبدالعزیز، ولی عبداہ شہزادہ محمد بن سلمان، نائب مزن وزیر ءُ وزیر ءِ دیمپانی ءُ سعودی عرب ءِ بر اتیں گونگیں الس آنی شگر ءُ منت گپ ءُ آئی ءِ واستہ نیکیں واھشت آنی درشان کت۔ سعودی ولی عہد ءَ ھم مزن وزیر ءِ جان سلامتی ءِ واستہ نیکیں واھگ ءُ پاکستان ءِ برات گونگیں الس ءِ دیمروئیءُ وشھالی ءِ واستہ دعا ءُ نیک کت۔
