جدہ۔8مئی (اے پی پی): مزن وزیر عمران خان ءُ سعودی ولی شہزادہ محمد بن سلمان ءَ پاکستان ءُ سعودی عرب ءِ نیام ءَ توامیں شوبگ آنی تہ ءَ یکوئی آناں گیش شاھیگانی دیگ ءِ جزم ءِ درشان کتگ۔ مزن وزیر عمران خان ءَ سعودی عرب ءِ تر ءُ تاب شمبے ءَ سعودی ولی شہزادہ محمد بن سلامان بن عبدالعزیز السعود ءَ گوں جدہ ءَ گند ءُ نند کت ءُ دو نیمگی، دمگی ءُ میاں اوستمانی کار آنی سر ءَ ھیال ریچی کت۔ گند ءُ نند ءِ ساھت ءَ مزن وزیر عمران خان ءَ خادم الحرمین شریفین شاہ سلمان بن عبدالعزیز ءِ واستہ ساپ دلیں واھشت آنی درشان کت ءُ ولی شہزادہ محمد بن سلمان ءِ نیمگ ءَ آئی ءِ تر ءُ تاب سعودی عرب ءِ دعوت دیگ ءِ پد ءَ شگر ءُ منت گپت۔ آئی ءَ رمضان المبارک ءِ برکتی ایں ماہ ءَ حرمین شریفین ءِ زیارت ءِ موہ پجاری کنگ ءِ پد ءَ دلوشی ءِ درشان کت۔ دوئیں سروک آں اے موہ ءِ سر ءَ دوئیں ملک آنی نیام ءَ یکجائی کمک ءِ نیک راھی، یکجائی شرپ ءُ ازت، وت مہ وتی دل یکیمی ءُ مھکمیں دود ءُ ربیدگ آناں برجم جوڑ کنگ ءِ جزم ءِ درشان کت۔ مزن وزیر ءَ سعودی عرب ءِ دمگی سالمی ءُ وت مستری ءِ واستہ پاکستان ءِ کمک آنی درشان کنان ءَ حرمین شریفین ءِ سرزمین ءَ پاکستانی آنی شرپ ءُ ازت ءِ ھوالگ ءَ سرپد کت۔ دوئیں سروک آں کرائم آنی ھلاسی، سزا بوتگیں کیزی آنی یلوئی، منیشات ءُ استیں کمیکلز ءِ سمگلنگ ءِ ھوالگ ءَ منوگری آں ابید 500 ملین ڈالر ءِ ھاٹیگ، پن بجلی، انفراسٹرکچر، ٹرانسپورٹ ءُ کمیونیکیشن ، ءُ آپی آسراتی ءِ دیمروئی ءِ ھوالگ ءَ منصوبگ آنی فنانسنگ ءِ واستہ تپاک نامہ آںی فریم ورک ءَ ھوار جتا جتائیں منوگری آنی سر ءَ دست چنگل جنگ ءِ موہ ءَ ساڑی اتنت۔ مزن وزیر عمران خان ءَ سعودی ولی زمانگ شہزادہ محمد بن سلمان ءَ را پاکستانی ءِ آیگ ءِ دعوت ھم دات، ایشی ءَ چہ پیسر مزن وزیر ءَ جدہ ائیر پورٹ ءَ پجگ ءِ پد ءَ سعودی ولی شہزادہ محمد بند سلمان ءَ را پُر مہری ءَ گوں وش اتک کت۔
