اسلام آباد۔ 07 مئی (اے پی پی) پاکستان تحریک انصاف نا حکومت جمہوریت نا سوگوی، گچین کاری بے ڈولی تے توننگ، گچین کاری تیان پد دھاندلی نادوبہ غاتا چٹفنگ و قومی شونداری کن ملک اٹی گچین کاری اصلاحات کن سنبرینگوک ءِ، دامسخت کن حکومت 20 اکتوبر 2020ء آ قومی اسمبلی ٹی الیکشن ترمیمی بل 2020ء ءِ پیش کرے ہراٹی گچین کاری ایکٹ 2017ء نا چندی شق آتے ٹی بدلی، ودکی یا اوفتے چٹفنگ نا سلاہ پیش کننگا، بل 6تُو آن زیات وخت آن قومی اسمبلی ٹی پدتموک ءِ و حزب اختلاف گچین کاری اصلاحات نا باندات آ حکومت تون تولنگ کن تیار اف۔ وزیراعظم عمران خان اپوزیشن ءِ سلہ خلکونے کہ او گچین کاری اصلاحات نا معاملہ غا حکومت تون گپ وتران کے وخت اس کہ اسپیکر قومی اسمبلی ءِ ہم دا معاملہ غا پارلیمانی کمیٹی اس جوڑ کننگ کن اسہ چھٹی اس نوشتہ کریسس ایلو بدلی آتے اٹ سلاہ ئی الیکشن ترمیمی بل 2020ء نا رداٹ سیکشن 94 و ذیلی شق(1)اٹی ترمیم نا سلاہ تننگانے۔ دا سلاہ ئی ترمیم نا رداٹ الیکشن کمیشن تون نادرا نا تکنیکی کمک اٹ پیشن ناملک رہینگوک آ پاکستانی تے گچین کاری تیٹی تینا حق رائے دہی نا کاریم اٹ اتنگ کن آسانی فراوان کننگ یا گچین کاری عمل اٹ اوار کننگ نا پورو اختیار دوئی مریک و داڑکن رازداری، سیکورٹی و مالیاتی انتظام ءِ پک کننگک۔ حکومت الیکشن ایکٹ 2017ء ناشق 103اٹی ترمیم نا ہم ارادہ تخک تانکہ الیکٹرانک وونٹنگ مشین تا کاریم اٹ اتنگ ءِ پک کننگ مرے و داڑکن حکومت تعلقدار فریق آتا مون آ ہم تعلقدار نظام ءِ تخنگ کن تیار ءِ دانا مسخت دادے کہ ٹیکنالوجی نا کاریم اٹ اتنگ نا کمک اٹ گچین کاری عمل نا چیلنج آتون مون تننگ مرے و الیکٹرانک وونٹنگ مشین تا کمک اٹ گچین کاری عمل کرفوک آتا پیدوار کمک ءِ کننگ مریک۔ الیکشن ایکٹ 2017ء تدوک آ قومی اسمبلی 22 اگست 2017ء آ منظور کریسس و داوخت آ پی ٹی آئی باسک آک بل آ شرہ ٹی وونٹرآتا بائیومیٹرک شناخت و سمندر پار پاکستانی تے وونٹ انا حق تننگ نا خواست کریسر۔ الیکشن ایکٹ 2017ء ٹی اسہ شق 103ءِ اوار کننگاسس ہراٹی الیکٹرانک وونٹنگ نا کاریم اٹ اتنگ و بائیو میٹرک تصدیق کن پاننگاسس۔ داٹی پاننگانے کہ الیکشن کمیشن ضمنی گچین کاری تیٹی الیکٹرانک وونٹنگ مشین و بائیو میٹرک تصدیق نا نظام نا آزمائشی بنداو آ کاریم اٹ اتنگ کیک۔ پاکستان تحریک انصاف نا حکومت داسہ وسیع البنیاد کہول آالیکٹرانک ووٹنگ مشین و بائیو میٹرک تصدیق آ زور شاغنگ ءِ و داڑآن ساڑی اپوزیشن ہم تینا تینا دور اٹ ضمنی گچین کاری تیٹی کاریم اٹ اتنگ آن امنا کریسر۔
