اسلام آباد۔ 07 مئی (اے پی پی) وزیراعظم نا سلاہکار واپار و زرکاری عبدالرزاق داؤد پارینے کہ دنیا ٹی ای کامرس نا کمک اٹ چاربلین ڈالر نا زرکاری مننگ ءِ، وزارت واپار، واشنگٹن و لاس اینجلس اٹی پاکستانی سفارت خانہ غاتا کوشست آتیان داایمازون پاکستانی کمپنی تا سیلرز آتا رجسٹریشن نازوت بناءِ کیک۔ داخیال آتا درشانی ءِ او جمعہ نادے آ میڈیا حوال ترساکرے۔ اوپارے کہ وزارت واپار تدوک آ اسہ سال آن دابابت کاریم کننگ ءِ۔ امریکہ ٹی پاکستانی سفارت خانہ نا کمک اٹ اسہ پائلٹ پروجیکٹ اس بناکننگانے۔ اوپارے کہ ٹیکنالوجی نا بدلی جہانی واپار ءِ بدل کرینے، زیات آن زیات ٹریفک اٹ آن لائن مارکیٹ پلیس و صارف بیس، سروس ڈیلیوری کن صارف آتیا مبنی نکتہ نظر اٹ بھلو کمپنی جوڑ مسنو۔ اوپارے کہ سیلرز رجسٹریشن پروگرام نا کمک اٹ ایس ایم ایز کن بھلا مارکیٹ آتون رابطہ ممکن مریک۔ اوپارے کہ پاکستان کن ای کامرس نا پوسکن آ دور آن پین کاروبار و پاکستانی برانڈ آتے مون آ دننگک۔ و او ایمازون نا کمک اٹ غٹ بھلا مارکیٹ آتسکان رسینگ نا قابل مریرہ۔ اوپارے ک نیشنل ای کامرس کونسل (این ای سی سی) دا معاملہ ءِ مون آ دننگ کن اہم کڑد ادا کننگ ءِ دُن کہ سرکاری بشخ انا غٹ ادارہ غاتا ہموڑے نمائندگی ساڑی ءِ۔ اوپارے کہ 2019ء نا ایسر اٹ کابینہ نا کنڈآن منظور کروک آ ای کامرس پالیسی آن پد غٹ کاریم تا بناءِ کننگا۔ اوپارے کہ دُن تو پاکستانی مصنوعات ایمازون آ مہالو آن بہامننگ ءُ انتئے کہ داٹی ٹیکسٹائل، گوازی، سل و سرجیکل نا گڑاتیکن گچین مینو فیکچرنگ بیس ساڑی ءِ۔ اوپارے کہ پاکستان ایمازون نا سیلرز لسٹ اٹ اوار اف۔
