اسلام آباد۔ 07 مئی (اے پی پی) وزیر مملکت پارلیمانی امور علی محمد خان و پاکستان تحریک انصاف نا راہشونک گچین کاری اصلاحات و الیکٹرانک وونٹنگ مشین تا کاریم اٹ اتنگ نا اہمیت ءِ تالان کرساپارینو کہ گچین کاری عمل اٹ شفافیت کن سائنس و ٹیکنالوجی نا بشخ آن کمک ہلوئی مریک و داڑکن الیکٹرانک ووٹنگ مشین جوان ءُ ذریعہ اس جوڑ مننگ کیک۔الیکٹرانک ووٹنگ نا بابت آرڈیننس اسمبلی ٹی شرہ کن پیش کننگک۔ ”اے پی پی“ ءِ اسہ خاص ءُ انٹرویو اس ترسا اوپارے کہ پاکستان اسہ جمہوری ءُ ملک اسے و ننا الس جمہوری سوچ تخک۔ اوپارے کہ الس مدام آجو فیصلہ کرینے۔ ہرکس کہ الس نا فائدہ ٹی کاریم کیک الس اونا است بڈی ءِ کیک ولے اوکان پد ہم الس نا وونٹ آ ڈاکہ خلنگک،، مخلوق وونٹ پین اسٹ ءِ ایترہ، پیش تمک پین اسٹ نا۔ اوپارے کہ 1971آن داتم اسکان اخس کہ گچین کاری مس مدام اوفتیا سوج ہرفنگا، داحالیت آتے مون آ تخسا وزیراعظم عمران خان الیکٹرانک ووٹنگ مشین نا کمک اٹ گچین کاری کرفنگ نا سجفینے۔ اوپارے ک کرکٹ اٹ ہم عمران خان بھارت کون آ ازلی دشمن نا برخلاف ہوم سیریز اٹی نیوٹرل ایمپائر درستی راستی کرفے۔ اوپارے کہ ننا حکومت وزیراعظم عمران خان نا وژن نا رداٹ پاکستان اٹی ہم اسہ پوسکن ءُ سیاسی کلچر اس اتنگ خواہک ہرانا کمک اٹ گچین کاری ناعمل ءِ ساف و منصفانہ کننگ خواہک۔ اوپارے کہ نن اسل دعویٰ کپنہ کہ داڑآن سد درسد شفافیت بریک ولے داخس ضرور پاننگ خواہ کہ بھلو حد اسسکان گچین کاری عمل اٹ گچینی بریک۔ تحریک انصاف نا باسک قومی اسمبلی علی نواز اعوان پارینے کہ جمہوریت اسہ ارتقائی ءُ عمل اسے ہراٹی وخت اتون اوار اوار بدلی برسا کیک آئین اٹ چندی ترمیم دانا پیدوار شاہدی ءِ۔ اوپارے کہ گچین کاری اصلاحات ہم ساڑی آ وخت انا اہم گرج ءِ و ننے مچ آ دنیاآنبار ای وی ایم نا کنڈآ ہنوئی مریک۔
ہنداوڑ 28 ارب روپئی زرمبادلہ مون تروک آ پیشن نا ملک رہینگوک آ پاکستانی تے وونٹ اناحق تروئی مریک ہراڑکن ننے گچین کاری اصلاحات نا کمیٹی اس جوڑ کروئی مریک۔ تحریک انصاف نا مرکزی سیکرٹری احمد جواد پارے کہ مستین اٹ غٹ گچین کاری تیٹی دھاندلی نا دوبہ خلساکننگانے دا خرابی ءِ چٹفنگ و شفافیت اتنگ کن ہروڑءِ اختیار کننگے۔
تحریک انصاف نا مرکزی راہشون عامر محمود کیانی پارے کہ الیکٹرانک وونٹنگ مشین تا کاریم اٹ اتنگ آن گچین کاری نتیجہ غاتے ٹی تاخیر نا سدباب مریک،۔ لس گچین کاری تا وخت آ دھاندلی نا دوبہ غاتیان پد حکومت نا مچ آ مدہنداالزام تراشی ٹی گدرینگک داڑکن الیکٹرانک ووٹنگ مشین ءِ درستی راستی کرفنگ بھاز اہم ءُ گام اس مریک۔ حکومت و اپوزیشن داڑآ اواری اٹ تولسا داٹی مروک آ خامی تے مُر کننگ کیرہ۔
پارلیمانی سیکرٹری آفتاب جہانگیر پارے کہ داٹی ہچ ءُ دارائے اس اف کہ گچین کاری اصلاحات بھاز المی ءِ۔ الیکٹرانک ووٹنگ مشین تیان جوان ءُ نتیجہ اس ہلنگ مریک، داٹی مروک آ خامی تے اواری اٹ تولسا مر کننگ مریک۔ داملک اٹی گچین کاری تیٹی دھاندلی و گچین کاری تے دُزنگ کن داوڑنا پوسکن آ ٹیکنالوجی درستی راستی کرفنگ نا گرج ءِ۔ تحریک انصاف نا باسک شیر علی ارباب پارے کہ الیکٹرانک ووٹنگ مشین گچین کاری تیٹی شفافیت اتنگ کن اہم ءُ پیش رفت اسے دااسہ جوان ءُ گام اسے دادے مون آ بایدے دننگے۔
