اسلام آباد۔ 07 مئی (اے پی پی) برطانیہ ٹی رہینگوک آ پاکستانی نژاد شاریک حکومت پاکستان نا سمندر پار پاکستانی تے وونٹ انا حق تننگ نا بابت فیصلہ نا ستاءِ کرسا پارینو کہ دا گام آن پردیسی پاکستانی تا لمہ وطن تون رابطہ پین سوگو مریک۔ جمہوری عمل و فیصلہ سازی ٹی اوفتے بشخ ہلنگ نا موقع ملک، پردیسی تا است بڈی آن ملک اٹی زرکاری و ترسیلات زر انا بننگ اٹ ودکی مریک۔ برطانیہ ٹی رہینگوک آ پاکستانی شاری افتخار بٹ اے پی پی تون گپ وتران کرسا پارے کہ ای 40 سال آن تینا خاہوت تون برطانیہ ٹی رہینگ انگ اُٹ، حکومت نا کنڈآن پردیسی پاکستانی تے وونٹ انا حق تننگ نا ہرا فیصلہ ءِ کننگانے داڑآن کنے بھلو خوشی اس مننگ ءِ۔ اوپارے کہ دا گام آن اوورسیز پاکستانی تے دا فائدہ مریک کہ او ملک اتون رابطہ تخرہ و اوفتے خوشی مریک کہ غیر انا دیار اٹ ہم ملک اوفتے یات تخانے۔ داگام آن پردیسی پاکستانی تیٹی خوشی اس تالان مسنے و داننکن شرف نا ہیت اسے کہ ننے وونٹ انا حق تننگ انگ ءِ۔ برطانیہ ٹی رہینگوک آ اسہ پین کاروباری شخصیت ضیاء الدین پارے کہ ای داحق اٹی اُٹ کہ پردیسی پاکستانی تے نئے بیرہ وونٹ انا حق ملے بلکن اوفتے گچین مرسا ایوان تیٹی تینا اوورسیز ایلم تا پبی نمائندگی ءِ کننگ نا ہم حق رسینگے تانکہ او اوفتے کن تینا ملک اٹ گچین کانود جوڑ کننگ کے، ہراڑآن اوفتے فائدہ مرے۔ اوپارے کہ داوڑ مف کہ پردیسیک خواری اٹ کٹوک آ پیسہ غاتے تو پاکستان آ گدریفر ولے اوفتے تینا ملک انا فیصلہ سازی ٹی ہچ ءُ حق اس مف۔ مانچسٹر اٹی 25 سال آن رہینگوک آ ڈاکٹر حیدر عباس پارے کہ ای جنرل فزیشن اپٹ و داہیت انا پبی مخ تفی ءِ کیوہ کہ پیشن ناملک اخس کہ پاکستانی اریر اوفتے وونٹ انا حق بایدے ملے۔ اوپارے کہ اخس کہ پردیسی ءُ اوفتا است پاکستان تون سُرک و ننا ہمدردیک مدام پاکستان کن ءُ داخبر ءِ بنگٹ خوشی مس کہ حکومت پردیسی پاکستانی تے وونٹ انا حق تننگ والا ءِ داگام آن ننا است بڈی مریک و مست آن زیات ملک اٹی زرکاری ہم کینہ۔
