اسلام آباد۔ 07 مئی (اے پی پی) اسلام آباد چیمبر نا مسکوہی صدر و چیمبر آف سمال ٹریڈرز نا مسکوہی سرپرست شاہد رشید بٹ پارینے کہ شوکت ترین نا وزیر خزانہ جوڑ مننگ پاکستان نا خوشی بختی ءِ۔ الس آ اومیت و کاروباری برادری سکھ انا ساہ اس ہلکونو۔ اسلام آباد چیمبر نا مسکوہی صدر و چیمبرآف سمال ٹریڈرز نا مسکوہی سرپرست شاہد رشید بٹ پارے کہ او زرگزران نا سمت ءِ سہی کننگ ءِ ہراڑآن الس ءِ ریلیف ملک۔ آئی ایم ایف نا سخت شڑت آتا بارواٹ اونا جیرت مندانہ موقف، بجلی نا نرخ و خراج اٹی ودکی کپننگ و شونداری خڑچ آتے ٹی ودکی نا فیصلہ غان الس و کاروباری برادری ملکی زرگزران نا آخبت نا بارواٹ پراومیت مسنے۔ وزیرخزانہ نا فیصلہ غاتیان نئے بیرہ زرگزرانی بحالی نا عمل ترند مریک بلکن الس ءِ روزگار ہم ملک۔ شاہد رشید بٹ جمعہ نادے آ تینا اسہ بیان اسے ٹی پارے کہ وزیر خزانہ حکومتی کٹیا ٹی ودکی و وام تے کم کننگ کن شرح نمو ءِ ودفنگ نا فیصلہ کرینے ہراستاکڑزک۔ ملکی شونداری کن شرح نمو ٹی ودکی المی ءِ۔ اوپارے کہ دین آن پد ہم زرگزران نا گڑاس بشخ گچین مننگ ءُ ولے زرگزرانی بحالی نا رفتار ءِ ودفنگ کن اہم بشخ آتے کن زوت آن زوت کمکی پیکج نا پڑو ہم المی ءِ۔
