اسلام آباد۔ 07 مئی (اے پی پی) بنجائی وزیر حوالکاری و شینکاری چوہدری فواد حسین پارینے کہ وزیراعظم عمران خان نا دورہ سعودی عرب آن ہڑتوم آ ملک آتا نیام اٹ تعلقداری ٹی پوسکن ءُ جہت اس نظر بریک، وزیراعظم عمران خان نا مچ آ دنیا ٹی کاریم کروک آ پاکستانی مزور دوست پالیسی آ اپوزیشن نا تنقید سمجھ آن ایڑتر ءِ، اپوزیشن اوورسیز پاکستانی تے وونٹ انا حق تننگ، گچین کاری اصلاحات، کانود جوڑ کننگ تون اوار ہر جوان انگا کاریم نا مخالف ءِ، حلقہ این اے 249”ری کاؤنٹنگ“ نا آخا”ری پول“ نا معاملہ ءِ، پی ٹی آئی نا ری پول موقف آ اینو (ن) لیگ سلوک نظر بننگ ءِ، اگہ اپوزیشن سنجیدہ کڑد ادا کے تو اسہ ہندن ءُ گچین کاری نظام اس تننگ اٹ سرسہب مرینہ اوکان پد بروک آ گچین کاری نتیجہ ہر اسٹ ءِ قابل قبول مریک۔ اپوزیشن مقدمہ غاتے عدالت آتے ٹی سرایتے اگہ نظام سہی کننگ کن ہیت کروئی ءِ تو ننا درگہ مدام ملوک ءِ۔ او جمعہ نادے آ سلاہکار واپار رزاق داؤد تون اوار پاک چائنا فرینڈ شپ سینٹر اٹ پریس کانفرنس آن تران کریکہ۔ بنجائی وزیر حوالکاری و شینکاری چوہدری فواد حسین پارے کہ وزیراعظم عمران خان نا کماشی ٹی پیشن نا واپارو ایمزون اٹی سرسہبی دوئی کرینن۔ اوپارے کہ وزیراعظم عمران خان سعودی عرب نا دورہ ءِ کننگ کن ہِننگ ءِ دادورہ غان ہڑتوم آ ملک آتا تعلقداری پین سوگو مریک و داٹی پوسکن ءُ جہد اس نظربریک۔ اوپارے کہ سعودی ولی عہد نا کنڈآن ایران تون تعلقداری تے گچین کننگ نا ہیت ستاکڑزک۔ وزیراعظم عمران خان اولیکو مسلمان حکمران ءِ ہرا سعودی عرب و ایران نا نیام اٹ گچین تعلقداری نا ہیت ءِ کریسس۔ اوپارے کہ اینو اپوزیشن نا تنقید ءِ خناٹ حیرت مسنے۔ وزیراعظم عمران خان سفیر آتیا زور شاغا کہ پیشن نا ملک آتے ٹی رہینگوک آ پاکستانی خاص وڑاٹ خواری کش تپہ نا ویل آتے ایسر و اوفتے آسراتی فراوان کننگے۔ ملک انا وزیراعظم اولیکووار اشرافیہ وزورآور تپہ نا جاگہ غا مزور تپہ تون سلوک ءِ، پیشن نا ملک اٹی پدریسہ ریپ انا شکار زالبول نا دادرسی ءِ کننگ نا جاگہ غا اودے زیزاریفسا پدی گدریفنگ، مزور تپہ ءِ توننگ کن خل تخسا کسر ءِ بند کروک آ سفارتکار آتا برخلاف سنجیدہ غاو تے وزیراعظم بنپک تو ولدا دیر اس بنک۔ اوپارے کہ کوویڈ۔ 19 نا دین اٹی پیشن نا ملک آتیان پاکستانی تے اتنگ و ایلو جوان انگا کاریم تے ٹی سفارت خانہ غاتا جوان ءُ کڑد اسے ہرانا نن ستاءِ کینہ ولے السی غاوتیا ہچ ءُ سمجھوتہ اس مفک۔ اوپارے کہ اپوزیشن ءِ تنقید برائے تنقید نا سیاست آ نظرثانی کروئی مریک۔ اوپارے کہ اینو میڈیا نا گڑاس بشخ آتے ٹی حکومت ءِ اینٹی لیبر نا وڑاٹ ظاہر کننگا ہرا سہی اف۔ میڈیا و سیاسی اشرافیہ ءِ مزور و الس تون سلوئی مریک۔ اوپارے کہ حلقہ این اے 249اٹی اسہ بیگ اسے نا سیل ہم رکھ اف، فارم 46 ہم غیب ءِ، اینو (ن) لیگ ہم پی ٹی آئی نا ری پول نا موقف تون سلوک ءِ، اگہ اپوزیشن سنجیدگی نا درشانی ءِ کے تو اسہ گچین ءُ قابل عمل گچین کاری نظام اس اتنگ کینہ۔ بنجائی وزیر چوہدری فواد حسین پارے کہ الحمداللہ بنجائی کابینہ جرنلسٹ پروٹیکشن ایکٹ نا منظوری ءِ تسنے، دااسہ لینڈ مارک کانود اسے۔ کانود نا رداٹ ہرامیڈیا ہاؤس کنفلیکٹ زون اٹ تینا صحافی ومیڈیا ورکرآتے گدریفک تو او رکھ انا ازباب تننگ نا پابند ءِ۔ اگہ صحافی، میڈیا ورکرآتے نسخان مریک تو ادارہ دانا زموارمریک۔ اولیکو وار صحافی نا ذرائعءِ رکھ تننگانے۔ کس اس ذرائع نا ہریفنگ کپک۔ اسہ ادارہ اس جوڑ کننگ انگ ءِ ہراٹی صحافی تا ویل آتے بِننگک و ایسر مریک۔ اوپارے کہ چنکا عئید آن مست بنجائی حکومت اشتہار آتا مد اٹ میڈیا ہاؤس ءِ 40 کروڑ روپئی اداکرینے۔ اومیت ءِ صحافی و میڈیا ورکرآتاتنخواہ تا ویل مفک۔ اوپارے کہ میڈیا ہاؤس آتے سپورٹ کننگ کن پروگرام اس اتنگ تون اوار اوار میڈیا ڈویلپمنٹ اتھارٹی اس جوڑ کننگ اُن۔ اسہ سوج اسے نا ورندی ٹی بنجائی وزیر چوہدری فواد حسین پارے کہ پی ٹی آئی حکومت نا اِرابھلو قول ئسر ہراٹی اسہ کروڑ نوکری 50 لکھ اُراجوڑ کینہ، نوکری تیا ڈیٹاءِ یکجا کننگ انگ ءِ زوت قوم انا مون آ اتینہ۔
