اسلام آباد۔ 07 مئی (اے پی پی) بنجائی وزیر حوالکاری و شینکاری چوہدری فواد حسین پارینے کہ وزیراعظم عمران خان تینا دورہ سعودی عرب اٹی ہڑتوم آ ملک آتے ٹی اسٹریٹجک پارٹنر شپ، سپریم کوآرڈنیشن کونسل و میڈیا پارٹنر شپ اتون اوار اقتصادی شریداری نا بارواٹ گپ وتران کیک۔ سعودی ٹی وی چینل الاخباریہ تون گپ وتران کرسا بنجائی وزیر حوالکاری و شینکاری پارے کہ وزیراعظم عمران خان نا سعودی عرب نا مسٹ میکو دورہ مریک۔ وزیراعظم عمران خان نا سعودی سرکڑدہ غاتون گچین جند اناتے تعلقداری ءِ، دا تعلقداری مہرو مریبت و ایلمی نا رشتہ غا مبنی ءِ۔ بنجائی وزیر پارے کہ نن کشمیر نا ویل انا بارواٹ سعودی سرکڑدہ غاتا کنڈآ ہُننگ اُن۔ سعودی عرب کشمیر نا ویل انا ایسری ٹی اہم ءُ کڑد اس ادا کننگ کیک۔ اوپارے کہ وزیراعظم ایران و سعودی عرب نا نیام اٹ علاقائی تنازعہ نا چٹفنگ نا است خواہی نا درشانی ءِ کرینے،۔ ملک آک اسہ ایلو نا وتواجہی نا بایدے شرف ءِ کیر۔ چوہدری فواد حسین پارے کہ ایران تون مذاکرات نا بارواٹ سعودی ولی عہد نا ساڑی آ بیان نا بابت وزیراعظم عمران خان تینا کڑد ءِ ادا کیک۔اوپارے کہ نن اسلامی دنیا کن سعودی سرکڑدہ غاتا خذمت ءِ امنا کینہ و نن دا چاہنگ خوانہ کہ ایران و مملکت سعودی عرب نا نیام اٹ تین پہ تینی گپ وتران ءِ آسان کننگ کن پاکستان ہراوڑآسراتی تننگ کیک۔ چوہدری فواد حسین پارے کہ پاکستان و سعودی عرب نا نیام اٹ دیرینہ و تاریخی دفاعی تعلقداری ءِ۔
