اسلام آباد۔ 06 مئی (اے پی پی) حکومت ملک اٹی خاص کر کم کٹیا کروک تپہ غاتے مون تروک ہنکینی ویل آتا ایسر کننگ کن کثیر الجہتی حکمت عملی اس اختیارکرینے ہرانا رداٹ بنجائی و صوبائی ہاؤسنگ اتھارٹی تا کنڈآن کم خڑچ انا اُراتا تفنگ تون اوار اوار نجی بشخ ءِ اڑزآن اُراتا بھلو کچ اسے آ تفنگ کن آسراتی و سازگار ماحول اس فراوان کننگ انگ ءِ۔ ہنداوڑ کم و نیامئی کٹیا کروک آ تپہ غاتے تینا جند انا اُرا یا اپارٹمنٹ تفنگ کن مارک اپ سبسڈی اتون مورگیج و ہاؤسنگ فنانس نا آسراتی فراوان کننگ انگ ءِ۔ سرکاری حوالی آن دوئی معلومداری تا رداٹ کم کٹیا کروک تپہ غاتے کن حکومتی شونداری ادارہ غاتا کنڈآن تینٹ یا پبلک پرائیویٹ شریداری نا کمک اٹ تفوک آ اول اسہ لکھ ہاؤسنگ یونٹ آتیا حکومت ہراُرا کن مسہ لکھ روپئی نا سبسڈی فراوان کیک۔ دامسخت کن 30 ارب روپئی جتا کننگانے۔
داوخت آ ملک اٹی جم وڑاٹ کم و ود 45ہزار لوکاسٹ ہاؤسنگ یونٹ تفنگ انگ ءُ ہرافتے ٹی ایل ڈی اے سٹی لاہور، جلوزئی، علی پور فراش اسلام آباد و زون۔ Vاسلام آباد اٹی 11 ہزار ہاؤسنگ یونٹ آتیا تالان چار ڈٹ آتا ساڑی ہی ٹی بناءِ کننگانے۔ دافتے ٹی پنجاب پیری اربن ہاؤسنگ اسکیم ہم اوار ءِ۔ یات سلے کہ وزیراعظم عمران خان 14 اپریل 2021ء آ سرگودھا ٹی دا اسکیم نا بناءِ کریسس۔ دااسکیم پنجاب نا چنکا شار و خلق آتے ٹی رہینگوک آ کم کٹیا کروک بندغ آتے کن تیار کننگا۔ داڈٹ ءِ حکومت پنجاب و پوسکن آ پاکستان ہاؤسنگ اینڈ ڈویلپمنٹ اتھارٹی نا اسیجائی کمک اٹ عملی دروشم اس تننگ انگ ءِ۔
حوالی نا رداٹ پنجاب نا چنکا شار و خلق آتا کیبی علاقہ غاتے ٹی چنکو ہنکینی کالونی(ہرافتے ٹی 100آن 500ہاؤسنگ یونٹ اوار ءُ) تفنگک۔ بورڈ آف ریونیو پنجاب نا کنڈآن بھاز کم نہاد (10ہزار روپئی فی مرلہ) غا ڈغار فراوان کننگک۔ ڈغار نا اسل نہاد بھاز زیات ءِ۔ بورڈ آف ریونیو پنجاب صوبہ پنجاب نا 35 ضلع غاتے ٹی 133 سائٹ آتا پیش کش کرینے۔ حوالی پارے کہ پوسکن آ پاکستان ہاؤسنگ اینڈ ڈویلپمنٹ اتھارٹی نا ٹیمک 27 ضلع غاتے ٹی 58سائٹ آتا سروے ءِ کریر و اولیکو ریسہ ٹی کم و ود 10 ہزار ہاؤسنگ یونٹ آتا تفنگ کن 41 سائٹس (22ضلع غاتا 39 تحصیل آتے ٹی) نا سفارش کرے۔ حکومت پنجاب فیز۔ Iانا سائٹ آتیا لینڈ ڈویلپمنٹ و انفراسٹرکچر ورک اکن 3 ارب روپئی نا سیڈ منی و ریوالونگ فنڈ فراوان کننگ ءِ۔
پوسکن آ پاکستان ہاؤسنگ اینڈ ڈویلپمنٹ اتھارٹی /بنجائی حکومت ہرہاؤسنگ یونٹ کن 3 لکھ روپئی نا سبسڈی فراوان کننگ ءِ وخت اس کہ وزیراعظم نا مارک اپ سبسڈی اسکیم نا رداٹ 3 درسد مارک اپ آ مورگیج نا بست وبند ہم کننگ انگ ءِ۔ ایف ڈبلیو او و این ایل سی سائٹ آتیا شونداری کاریم سرایتک و انجینئرنگ، پروکیورمنٹ و کنسٹرکشن(ای پی سی) کنٹریکٹر آتا وڑاٹ چنکا ہاؤسنگ یونٹ (3.5مرلہ)تفک۔ دا سائٹ آتے ٹی ودکی نا گنجائشت ارے وداکان پد ایلو 4 ہزار ہند آتے ہم داسائٹ آتے اوار کننگ مریک۔
دا ودیکی ءُ ڈٹ اسے و اوکان پد دادے پنجاب نا 36 ضلع غاتا 143تحصیل آتسکان ودفنگ مریک۔ 10 آن زیات سائٹ آتا بناءِ وزیراعظم عمران خان 6 مئی آ کرے ہرافتیا 2356یونٹ تفنگک۔ 3.5مرلہ نا ہر ہند آ خڑچ کم و ود 15 لکھ روپئی بریک۔ 20سال انا مد اکن ماہانہ مورگیج انسٹالمنٹ 5068روپئی مریک و 10 سال انا مد اکن کم و ود 10 ہزار روپئی مریک۔ دااسکیم کن بینک آتا اسہ کنسورشیم پروجیکٹ اس فنانس و مورگیج فراوان کننگ ءِ۔ بینک آف پنجاب داٹی مون آٹے۔
پنجاب نا 10 تحصیل چنیوٹ، ڈی جی خان، چنیاں، خانیوال، خوشاب، منڈی بہاؤالدین، میانوالی، جلال پور پیروالا، سوگودھاٹی اسہ وخت اٹی دا اسکیم نا بناءِ کننگا۔ حکومت نا کنڈآن آسراتی و آسودہی اٹ نجی بشخ لوکاسٹ ہاؤسنگ اٹ است خواہی نا درشانی ءِ کرے و اسہ لکھ آن زیات ہاؤسنگ یونٹ آتا تفنگ کن پوسکن آ پاکستان ہاؤسنگ اینڈ ڈویلپمنٹ ءِ سلاہ مون تس۔ ہرافتیان 70 ہزار ہاؤسنگ یونٹ آتیا تالان 45 ڈٹ آتے مہالو آن شارٹ لسٹ کننگانے۔ دا ڈٹ آتیا کاریم زوت بناکیک۔ سبسڈی اتون ہاؤسنگ فنانس و مورگیج نا آسراتی ہاؤسنگ نا رداٹ اسہ حقی ءُ گیم چینجر اس جوڑ مریک۔
دانا تصور دادے کہ کم و اوسط کٹیا کروک الس اُرانا کِرانا بریبر ماہانہ قسط ترسا تینااُرانا مالک جوڑ مننگ کیک۔ حوالی نا رداٹ حکومت کم و اوسط کٹیا کروک بندغ آتے کن مورگیج نا قسط آتے کم کننگ کن بروک آ 10سال انا مد اٹی 35 ارب روپئی نا مارک اپ سبسڈی فراوان کننگ ءِ۔ دااسکیم نا رداٹ پوسکن آ پاکستان ہاؤسنگ اینڈ ڈویلپمنٹ اتھارٹی و حکومتی ادارہ غاتا کنڈآن نجی بشخ انا کمک اٹ 5 مرلہ اسکان نا ہاؤسنگ یونٹ آتیا اولیکوپنچ سال اکن 3 درسد مارک اپ و بروک آ پنچ سال اکن 5 درسد مارک اپ مریک۔
دانا زرتس انا وخت ءُ پاس 20 سال مریک۔ مخلوق نا کنڈآن تفنگ یا ہلوک آ پنچ مرلہ اسکان نا ہاؤسنگ یونٹ آتیا اولیکوپنچ سال اکن مارک اپ 5 درسد و بروک آ پنچ سال اکن مارک اپ 7 درسد مریک۔ وام انا زرانا حد 60 لکھ روپئی اسکان ءِ وخت اس کہ زرتس انا زیات آن زیات وخت 20 سال ءِ۔ ہنداوڑ 10 مرلہ نا ہاؤسنگ یونٹ آتیا اولیکوپنچ سال اکن مارک اپ 7 درسد، بروک آ پنچ سال اکن 9 درسد ءِ۔ وام انا زیات آن زیات زر اناحد 10 ملین روپئی ءِ و زرتس نا زیات آن زیات وخت 20 سال ءِ۔ نظرثانی مروک اسکیم نا رداٹ وام انا زر ءِ اِراہنداخہ کننگانے و مائیکرو فائنانس بینک آتے داٹی اوار کننگانے۔
اخوت کون آ مائیکرو فائنانس ادارہ بینک آتے کن ایجنٹ آتا وڑاٹ ہم کاریم کننگ کیک۔ لوکاسٹ ہاؤسنگ اسکیم نا مون آ دننگ کن چست کروک آ چندی گام گیج آتے ٹی ہاؤسنگ و کنسٹرکشن کن فکسڈ خراج اسکیم درستی راستی کرفنگانے۔ دانا رداٹ ہروڑنا تعمیرات کن خراج آتے ٹی نمان کمتی کننگانے ولے کم خڑچ انا ہاؤسنگ یونٹ آتے کن خراج آتے ٹی 90 درسدچھوٹ تننگانے۔ ہنداوڑ جائیداد آتا بہاو ہلنگ آ خراج و ڈیوٹی ہراچندی صوبہ غاتے ٹی 4 آن 7 درسد ئس۔ دادے کم کرسا 2 درسد کننگانے۔ بینک آتے پاننگانے کہ او تینا تعلقدار نجی بشخ انا کریڈٹ نا 5 درسد ہاؤسنگ فنانس و تعمیرات تون تعلقدار سرجزآتے کن فراوان کیر ہنداخاطرآن داسہ بینک داسال انا ایسر اسکان ہند و تعمیرات کن 378ارب روپئی نا فنانسنگ کیک۔ ون ونڈو ڈیجیٹل پورٹل نا کمک اٹ ڈٹ آتا عمل ءِ آسان کننگانے۔
