لاہور۔ 06 مئی (اے پی پی) وزیراعظم عمران خان پارینے کہ حکومتی گام گیج آن پاکستان اٹی کشاری انقلاب بریک، سیل و سوات نا بشخ آن نن تینا درآمد آتیان زیات زرمبادلہ دوئی کننگ کینہ، تعمیرات نا بشخ اتون 30 صنعت وابستہ ئپ، دا بشخ آ چکار کرسا بے روزگاری ٹی کمتی و ملکی دولت اٹ ودکی کننگ مریک، کم خڑچ ہاؤسنگ ڈٹ شروعات ءِ، داڑآن کچہ انگا آبادی تا تالانی کم مریک، کچہ انگا آبادی تے ترک ماڈل نا رداٹ بدل کننگ نا ڈٹ اس اتنگ اُن، قوم ءِ تاکیدءِ کہ او ماسک بینر، بیرہ ماسک اٹ کورونا غا کنٹرول کننگ مریک۔ او پنچ شنبے نادے آ داڑے رائیونڈ اٹی پنجاب پیری اربن کم خڑچ ہاؤسنگ اسکیم نا ڈٹ انا بناءِ کننگ نا وخت آ تران کریکہ۔ داوخت آ وزیراعلیٰ پنجاب عثمان بزدار ہم تران کرے۔ وزیراعظم عمران خان پارے کہ ننا ذہنیت دا جوڑ موسس کہ دا ملک اٹی اسہ اشرافیہ تپہ اس پاکستان ءِ ہروڑاٹ کوزہ ٹی ہلکونے، تعلیم نوکری تون اوار غٹ آسراتیک اوفتا کوزہ ٹی ءُ۔ زندان تیٹی بیرہ غریب آن خننگرہ، ننا انصاف نا نظام زوراورداڑیل ءِ ہلنگ کپک۔ مستین اٹی ننا سرکاری ہسپتال گچین ئس ولے کرار کرار آ ہزگارتا درمان کن نجی ہسپتال جوڑ مس ہرا بھاز ہزگار ئسر او درمان کن پیشن نا ملک آ ہنارہ، اسہ ہندن ءُ نظام اس شون ہلک کہ ملک اٹی دا سوچ الوکہ کہ لس بندغ امر زندءِ تیر کننگ ءِ۔ ہنداوڑ ہاؤسنگ نا بشخ ءِ ہم گوجالنگا۔ لاہور مستین اٹ باغ تا شار ئس، داڑے کچٹی الوکہ ولدا ہزگارآتے کن بحریہ و ڈیفنس نا علاقہ جوڑ مس۔ کس اس لس بندغ کن تینا اُرانا سجفتو ولدا کچہ انگا آبادیک جوڑ مننگ بناکریر اینو نیمہ کراچی بستی تیا تالان ءِ ہراڑے بجلی و گیس انا غیر کانودی کنکشن رشوت ترسا دوئی کننگک۔ سیوریج نا نظام اف۔ اوپارے کہ داڑتون اوار اوار کوزہ گروپ متحرک مرسا ہنا، عدالت آتے ٹی داوڑ نا کیس 50، 50 سال پدسلوک ءُ۔ جج پولیس تون اوار ایلو محکمہ غاک اوار ملار۔ وزیراعظم عمران خان پارے کہ پوسکن آ پاکستان ہاؤسنگ سوسائٹی نا تصور لس بندغ، تنخواہ دار تپہ، سرکاری ملازم، مکینک و ویلڈر کن اُرانا آسراتی فراوان کننگ ءِ۔ وزیراعظم پارے کہ قوم ءِ پاننگ خواوہ کہ داہیت ءِ ذہن نشین کے ہرا راج لس بندغ آ چکار کپک او شون ہلنگ کپک۔
