اسلام آباد۔ 06 مئی (اے پی پی) وزیراعظم عمران خان سعودی ولی عہد محمد بن سلمان بن عبدالعزیز نا سلہ غا جمعہ نادے آ سعودی عرب نا مسہ دے ئی سرکاری دورہ غا روانہ مریک، وزیراعظم آفس نا میڈیا ونگ انا کنڈآن جاری بیان نا رداٹ وزیر خارجہ شاہ محمود قریشی و کابینہ نا ایلو وزیر آک ہم وزیراعظم تون اوار مریرہ۔ دورہ ٹی وزیراعظم سعودی سرکڑدہ غاتون زرگزران، واپار، زرکاری، توانائی، پاکستانی خواری کش آتے کن ملازمت آتا وارخواہی، سعودی عرب اٹی رہینگوک آ پاکستانی تتون ہڑتوم آ کنڈآتا کمکاری نا غٹ بشخ آتا بابت گپ وتران کیک،دورہ ٹی ہڑتوم آ کنڈآک تین پہ تینی است خواہی نا علاقائی وجہاننی باندات آہم گپ وتران کیرہ۔ دورہ ٹی بھاز انگا ہڑتوم آکنڈآتا معاہدہ و مفاہمتی یات داشت آتیا دستخط گمانی ءِ، وزیراعظم عمران خان دورہ ٹی اسلامی کمکار تنظیم نا سیکرٹری جنرل ڈاکٹر یوسف، ورلڈ مسلم لیگ نا سیکرٹری جنرل محمد بن عبدالکریم، عیسیٰ و مکہ و مدینہ ٹی حرمین شریفین نا آئمہ کرام تون ہم اوڑدہی کیک، وزیراعظم عمران خان جدہ ٹی رہینگوک آ پاکستانی تتون ہم اوڑدہی کیک۔ پاکستان و سعودی عرب نا نیام اٹ اسیجائی عقیدہ، تاریخ، و تین پہ تینی کمکاری آ مبنی مریس و تاریخی تعلقداری استوار ءِ، پاکستان نا الس خادم الحرمین الشریفین ءِ بھاز عزت و شرف نا نظر اٹ ہرک و ہڑتوم آ ملک آتا نیام اٹ غٹ بشخ و چندی علاقائی و جہانی امور خاص وڑاٹ امت مسلمہ ءِ مون تروک باندات آ خڑکی کمکاری ساڑی ءِ، سعودی عرب جموں و کشمیر آ اوآئی سی نا رابطہ گروپ نا باسک ءِ، داکان بیدس سعودی عرب دالحاظ اٹ ہم بھاز اہمیت تخک کہ بیست لکھ آن زیات پاکستانی سعودی عرب اٹی رہینگ انگ و ہڑتوم آ ملک آتا شونداری و شونہالی ٹی تینا کڑد ءِ ادا کننگ ءُ، پاکستان و سعودی عرب نا نیام اٹ خڑکی کمکاری و برادرانہ تعلقداری نا مون آ دننگ اٹ باقاعدہ بڑزکو کہولی ہڑتوم آ کنڈآتا دورہ بھاز اہمیت ناحامل ءِ۔
