اسلام آباد۔ 04 مئی (اے پی پی) وزیراعظم عمران خان غٹ مذہب آتا منوک آتا است آزاری ءِ توننگ کن کانودی گام گیج آتیا زور شاغسا پارینے کہ دہشت گردی و انتہاپسندی نا ہچ ءُ مذہب اس مفک آجوئی درشانی نا آڑاٹ ناموس رسالت ﷺ اٹ گستاخی یک و نیم ارب مسلمان تا است آزاری مریک و اسلا م فوبیا غان بین المذاہب خار ءِ تہو ملک مسلم دنیا ءِ یکجا مرسا اجتماعی کوشست کننگ نا گرج ءِ۔ داخیال آتا درشانی ءِ او اسلامی کمکار تنظیم نا باسک ملک آتا سفیر آتون اوڑدہی ٹی گپ وتران کرسا کرے۔ وزیراعظم پارے کہ او او آئی سی نا باسک ملک آتا سفیر آتے بخیر اٹ پاہک۔ وزیراعظم پارے کہ دنیا ٹی اسلاموفوبیا نا ویل مست آن زیات شدت اختیار کرینے ای وزیراعظم جوڑ مننگ آن پد کوشست کریٹ کہ مسلم ملک و دیکی دنیا نا نیام اٹ ہراخلیج ودنگ ءِ اودے کم کننگے۔ وزیراعظم پارے کہ اسلامی دنیا خواجہ کریم ﷺ نا ناموس اٹی گستاخی ءِ سگپک وخت اس کہ دیکی اودے آجوئی درشانی تکک۔ دیکی دنیا دا معاملہ غا مسلمان تا جوزہ غاتے پہہ مفننگ ءِ و مسلمان دیکی ملک آتا ذہن ءِ پہہ مفک۔ دیکی ءِ اندازہ ہی اف کہ مسلمانک تینا خواجہ کریم ﷺ نا اخہ در شرف ءِ کیرہ۔ وزیراعظم پارے کہ مسلمان ملک آک دیکی ءِ تینا احساسات و جوزہ غاتیان معلومدار کننگ کن ہچ ءُ پبی ءُ کوشست اس کتنو۔ دیکی کن مذہب نا تصور ننا تصور آن جتا ءِ بدبختی اٹ منہ وخت آن پد گستاخانہ واقعہ اس مریک ہرانا برخلاف مچ آ مسلم دنیا ٹی برانز و ردعمل مریک ہراڑآ دیکی دا پاہک کہ مسلمانک تنگ نظر ءُ و آجوئی درشانی نا قائل افس۔ وزیراعظم پارے کہ ای کوشست کریٹ کہ مسلم سرکڑدہ غاتے دا معاملہ اسٹ کیو و نن اواری اٹ دکی و یورپی ملک آتا راہشون آتے پہہ کین کہ ننا خواجہ کریم ﷺ نا ناموس و تکریم ہراوڑنا معاملہ اسے و آجوئی سلاہ درشانی نا آڑاٹ نن ناموس رسالت اٹ گستاخی ءِ سگنگ کپنہ۔ ننے دیکی ءِ داہیت ءِ سرپند کننگ نا گرج ءِ کہ دہشت گردی و اسلام نا ہچ ءُ تعلق اس اف۔ دہشت گردی و انتہاپسندی نا ہچ ءُ مذہب اس مفک شدت پسندی ءِ اسلام تون گنڈنگ آن جہانی کہول آمسلمانک زہمی مریرہ۔ وزیراعظم پارے کہ اسہ راج اسے ہم اونا انتہاپسند آتیان شناخت کننگ مفک۔ دیکی ٹی اسہ مسلمان اس اگہ دہشت گردی نا واقعہ اسے ٹی اوار مرے تو مچ آ مسلمان تے اونا زموار گوندنگ سہی اف۔ ننے دیکی ءِ پہہ کننگ نا گرج ءِ کہ خودکش جلہو و اسلام نا ہچ ءُ تعلق اس اف۔ وزیراعظم پارے کہ او آئی سی جہانی کہول آ آگاہی ودی کننگ کن تینا کڑد ءِ ادا کے و اسلام نا سہی تشخص و امن نا کلہو ءِ تالان کے۔ وزیراعظم پارے کہ پاکستان بین المذاہب ہم آہنگی کن کوشست کننگ ءِ اسلامو فوبیا غان بین المذاہب خار ءِ تہوملک و تہذیب آتا نیام اٹ افہام و تفہیم ءِ نسخان رسینگک۔ اسلامی ملک آتا سفیر آک اسلام فوبیا نا برخلاف وزیراعظم نا کوشست آتا ستاءِ کریر۔
