برلن۔ 12اپریل (اے پی پی) پاکستان و جرمنی واپار و زرکاری تون اوار چندی بشخ آتے ٹی ہڑتوم آ کنڈآتا کمکاری نا مون آ دننگ آ امنا کرینو۔ جرمنی پاکستان نا غٹ آن بھلا واپاری شریدار ءِ۔ نن غٹ بشخ آتے ٹی تینا تعلقداری تے پین سوگو کننگ نا خواہندار اُن۔ وزیر خارجہ مخدوم شاہ محمود قریشی دوشنبے نادے آ برلن اٹی ڈل آتا کہول آ مذاکرات آن پد جرمن ہم منصب ہائیکو ماس اتون اوار اسیجائی پریس کانفرنس آن تران کرسا پارے کہ برلن اٹی اینو داڑے ساڑی مننگ آ بھاز خوش اُٹ۔ کورونا نا برجا جہانی دین آن پد ہم بننگ آ ہراجم و جوش اٹ ننے بخیر کننگانے، داڑآ ای وزیر خارجہ ہائیکو ماس نا منت واری ءِ ہرفیوہ۔ اوپارے کہ دا دورہ اسہ ہندن ءُ وخت اسے آ مننگ ءِ ہراتم پاکستان و جرمنی ٹی سفارتی تعلقداری جوڑ مروک 70سال پورو مسنے۔ اوپارے کہ نن جرمنی تون پوسکن آ اقتصادی تعلقداری نا خواہندار اُن، داڑکن باقاعدہ فریم ورک اس ساڑی ءِ۔ پاکستان ءِ جی ایس پی پلس سٹیٹس ترفنگ اٹ جرمنی نا کمکاری آ منت وار اُن۔ وزیر خارجہ پارے کہ نن غٹ داوخت آ کورونا جہانی دینی چیلنج اتون مون تننگ اُن۔ وزیر خارجہ 15ملین ویکسین ڈوزز تننگ آ جرمن سرکڑدہ غاتا منت واری ءِ ہرفے۔ اوپارے کہ ایف اے ٹی ایف آ کمکاری پاکستان نا پالیسی تیا پت انا درشانی ءِ۔ جرمن چانسلر مارکل نا کماشی ٹی جرمنی شونداری نا بھلو مدارج اس طے کرے، جرمن چانسلر نا وزیراعظم عمران خان ءِ دورہ پاکستان نا سلہ نا خیرمقدم ءِ کیک وزیراعظم عمران خان کورونا حالیت آتے ٹی گچینی آن پد بریک۔ وزیر خارجہ پارے کہ اوغان امن عمل اٹ جرمنی نا کڑد ستاکڑزک، نن ہرامن، سوگو اوغانستان نا خواہندار اُن۔ اوپارے کہ مذاکرات اٹ سویلی ایشیانا سیکورٹی حالیت آتیا ننا سرجمی اٹ گپ وتران مس۔ پاکستان امن نا خواہندار ءِ، ولے ہندوستان 5 اگست 2019ء نا اسہ کنڈی گام گیج آتا کمک اٹ سویلی ایشیانا امن ءِ خطرہ غاتیان دوچار کرے۔ ہندوستان ءِ مذاکرات کن فضاءِ سازگار کروئی مریک۔ وزیر خارجہ پارے کہ جرمنی نئے بیرہ یورپی یونین بلکن جہانی کہول آ ہم اسہ اہم ءُ ملک اسے۔ ہڑتوم آ ملک آتا نیام اٹ تعلقداری گرم جوشی و تین پہ تینی ہم آہنگی اتون ءِ۔ جرمنی پاکستان نا غٹ آن بھلا واپاری شریدارءِ۔ نن غٹ بشخ آتے ٹی تینا تعلقداری تے پین سوگو کننگ نا خواہندار اُن۔ جرمن وزیر خارجہ ہائیکو ماس اتون اینو نا نشست اٹی تین پہ تینی است خواہی نا سرحال آتیا سجفین۔ نن واپار و زرکاری تون اوار چندی بشخ آتے ٹی ہڑتوم آ کنڈآتا کمکاری نا مون آ دننگ آ امنا کرین۔ نن زرگزرانی سفارت کاری ءِ کاریم اٹ اتسا اقتصادی کمکاری ءِ ودفنگ نا پالیسی آ سلوک اُن۔ اینو مذاکرات اٹی نن توانائی، ٹیکنالوجی نا تبادلہ تون اوار کثیر الجہتی بشخ آتے ٹی ہڑتوم آ کنڈآتا کمکاری نا مون آ دننگ نا بابت سیر اٹ گپ وتران کرین، ننے پت ءِ کہ پاکستان و جرمن نا تعلقداری ٹی خڑکی کمکاری نا اسہ پوسکن ءُ بشخ اس ملنگک۔ اوپارے کہ نن غٹ بشخ آتے ٹی کثیر الجہتی تعلقداری تا مون آ دننگ نا عزم آ سلوک اُن۔
