پاکستان نا رشین فیڈریشن و تاتارستان تون اوار اونا مسلم علاقہ تون دیرینہ شریداری ئِ
اسلام آباد۔ 19مارچ (اے پی پی) وزیراعظم محمد نواز شریف پارینے کہ پاکستان نا رشین فیڈریشن و تاتارستان تون اوار اونا مسلم علاقہ تون دیرینہ شریداری ئِ ہراڑآن تین پہ تینی مفاد نا غٹ بشخ آتیٹی اہم ئُ پیش رفت اس ہُننگ اٹی بریک۔ وزیراعظم آفس میڈیا ونگ آن جاری پریس ریلیز نا رداٹ او جمہوریہ تاتارستان نا صدر رستم منیکھانوف تون اوڑدہی ٹی خیال آتا درشانی ئِ کریکہ ہرایک شنبے نا دے ایوان وزیراعظم اٹی اوڑتون اوڑدہی کرے۔ وزیراعظم محمد نواز شریف پاکستان و روس انا نیام اٹ ڈیہہ ٹی امن و سوگوی نا مون آ دننگ کن مثبت کڑد و ہر بشخ اٹی سوگو شریداری نا عزم انادرشانی ئِ کرے۔ تاتارستان نا صدر و اوڑتون اوار پاکستان نا دورہ غا بروک آ ڈل انا جم و جوش اٹ خیرمقدم ئِ کرسا وزیراعظم پارے کہ تین پہ تینی دیرینہ تعلقداری داہیت انا شاہدی ئِ کہ پاکستان و روس انا نیام اٹ کمکاری ئِ ودفنگ کن ہروڑنا گام گیج چست کننگک اوزورشاغاکہ پاکستان تینا غٹ ہمسایہ غاتون غٹ ایسر نا چاری ویل آتیا امن ہیت وگپ نا کمک اٹ ایسر کننگ نا پالیسی آ عمل کننگ ئِ۔ تاتارستان نا صدر وزیراعظم محمد نواز شریف نا کنڈآن اونا دورہ پاکستان نا وخت آ گچین میزبانی آ اونا منت واری ئِ ادا کرے۔ اوپارے کہ تاتارستان نا کاروباری ڈل انا لاہور اٹی ثمر آور اوڑدہی مسنے۔ وزیراعظم اومیت ظاہر کرے کہ ہڑتوم آ ملک آتا بزنس مین تیا تالان جوائنٹ بزنس فورم تین پہ تینی واپار نا مون آ دننگ اٹی کمکار جوڑ مریک۔ اوپارے کہ بینکنگ ، حلال فوڈ، سیمنٹ نا پیداوار ، آٹو موٹو انڈسٹری ، فارماسیوٹیکلز، ٹیکنالوجی ، دودوربیدہ ، تعلیم نا بشخ آتیٹی کمکاری نا وارخواہی بایدے پٹنگے۔ ڈل اٹی ڈپٹی وزیراعظم البرٹ کریموف، پاکستان اٹی رشین فیڈریشن نا سفیر الیگزے ڈیڈوف، تاتارستان انویسٹمنٹ ڈویلپمنٹ ایجنسی نا چیف ایگزیکٹو طالیہ منولینا و ڈپٹی ڈائریکٹر خارجہ امور مارٹ گیٹن ہم اوار ئسر وخت اس کہ داوخت آ وزیراعظم نا خصوصی کمکار خارجہ امور طارق فاطمی ، وزیراعظم نا سیکرٹری فواد حسن فواد و دفترخارجہ نا ایڈیشنل سیکرٹری ظہیر جنجوعہ ئسک ہم ساڑی ئسر۔
