لاہور۔ 25 مارچ (اے پی پی) بنجائی وزیر ماحولیات، موسمیاتی بدلی و وزیراعظم نا خصوصی کمکار ملک امین اسلم پارینے کہ سموگ و چاگڑدی کچٹی تون مون تننگ نا اسٹ انگا ایسر شجرکاری ءِ۔ میاواکی جنگل اٹییک و نیم لکھ آن زیات نیال خلنگانے، پنجا کینال آ تالان لاہور میاواکی جنگل سویلی ایشیاء نا غٹ آن بھلا سائٹ ءِ۔ داخیال آتا درشانیءِ بنجائی وزیر لاہور اٹی جلوبوٹینیکل گارڈن اٹی میاواکی جنگل نا بناءِ کننگ ناوخت آ میڈیا تون گپ وتران کرسا کرے۔ اوپارے کہ وزیراعظم نا کلین اینڈ گرین پاکستان مہم نا رداٹ شجرکاری ءِ مون آ دننگ کن شار اٹی 51ہند آتیا جاپانی ٹیکنیک نا رداٹ جنگل خلنگ نا عمل برجاءِ، جلوبوٹینیکل گارڈن اٹی ایشیانا غٹ آن بھلا سائٹ آ پنجا کینال میاواکی جنگل نا نیال خلنگ نا عمل نا بناءِ کننگانے۔ اوپارے کہ لاہور ءِ کچٹی آن بچفوئی ءِ زیات آن زیات جنگل خلنگ المی ءِ۔ اوپارے کہ پی ایچ اے نا کوشست آن جنگل بوٹینیکل گارڈن اٹی پنجا کینال ڈغار آ 20وڑنا نیال خلنگانے، بنجائی وزیر پارے کہ میاواکی جنگل نا پورو ی آ پی ایچ اے کمامدارآتے مبارکبادی ایتیوہ کہ اوفک 25مارچ اسکان پنجا سائٹ ءِ پورو کرینو، دا پنجا سائٹ آتیٹی 5 لکھ نیال خلنگانے، ملک امین اسلم پارے کہ کوشست کینہ کہ لاہور اٹی 2 سد ہند آتیا میاواکی نا نیال خلنگک۔ بنجائی وزیر پارے کہ لاہوری تیکن مستائی اسے کہ میاواکی جنگل سموگ نا چٹفنگ نا سوب مریک۔ اوپارے کہ کوشست ءِ کہ میاواکی نا دنگ ءِ ودفسا مچ آ ملک اٹی نیال خلنگے تانکہ چاگڑد ءِ ساف ستھرا کننگ مرے۔ دا چرجوئی ٹی اسلام آباد اٹی 20 وخت اس کہ خیبرپختونخوانا100جتا جاگہ غاتیا میاواکی نا جنگل خلنگانے۔ اوپارے کہ میاواکی نا نیال موسمیاتی بدلی تون مون تننگ کن بھاز کاریمی ءِ۔ اسہ سوج اسے نا ورندی ٹی بنجائی وزیر پارے کہ پاکستان اٹی کچٹی نا غٹ آن بھلا سوب ہمسایہ ملک بھارت ءِ ہراوڑ پاکستان کچٹی آ کنٹرول کننگ ءِ ہمووڑ بھارت ءِ ہم گام گیج کروئی مرے۔ اوپارے کہ نن بھارت ءِ سلہ خلینہ کہ اواری اٹ چاگڑدی بدلی کن گام گیج کین انتئے کہ دا مخلوق نا زند انا ویل ءِ۔ اسہ پین سوج اسے نا ورندی ٹی ملک امین اسلم پارے کہ ہاؤسنگ سوسائٹی نا بابت سوگو حکمت عملی اس جوڑ کننگ اُن ہرانا رداٹ کشاری رقبہ غا ہاؤسنگ سوسائٹی جوڑ کننگ مفک۔
