اسلام آباد۔ 25 مارچ (اے پی پی) جہانی مالیاتی فنڈ(آئی ایم ایف) نا انتظامی بورڈ پاکستان کن 50 کروڑ ڈالر نا مون نا قسط انا دمدستی وڑاٹ جاری کننگ نا منظوری ءِ ترسا پارینے کہ دین آن ودی مروک آ چیلنج و مشکل و ودکی فنڈ آسراتی نا بابت پاکستان نا حکومت نا عزم اٹ زرگزران ءِ سیبو تننگ، وام تا پائیداریت ءِ پک کننگ و پنجر جاتی اصلاحات نا نیام اٹ توازن ءِ قائم کننگ اٹ کمک رسینگانے۔ آئی ایم ایف اقتصادی اصلاحات و ودکی فنڈ آسراتی نا بابت پاکستان نا گام گیج آتیا است جمی نادرشانی ءِ کرینے۔ جہانی مالیاتی فنڈ انا کنڈآن جاری مروک آ بیان اٹی پاننگانے کہ انتظامی بورڈ انا دیوان اٹی پاکستان کن ودکی فنڈ آسراتی (ای ایف ایف) نا رداٹ ارٹ آن ہلیس پنچ می جاچ ءِ پورو کننگا۔ بورڈ پاکستان ءِ بجٹ کمک کن کم و ود اِرا ارب ڈالر آن دمدستی وڑاٹ 50 کروڑ ڈالر نا مون نا قسط ءِ جاری کننگ نا منظوری ءِ تسنے۔ آئی ایم ایف 3 جولائی 2019ء آ پاکستان کن ای ایف ایف نا منظوری ءِ تسوسس۔ داپروگرام نا مسخت اقتصادی اصلاحات، کوویڈ۔ 19 آن زہمی زرگزران نا بحالی، انسانی زند و روزگار نا بچفنگ اٹ کمک فراوان کننگ تون اوار اوار کلی زرگزران نا سوگوی و وام تا پائیداریت اٹ ودکی کننگ ءِ۔ بیان اٹی پاننگانے کہ آئی ایم ایف پروگرام نا بابت پاکستان نا پیش رفت است بڈءِ۔ کوویڈ۔ 19نا جہانی دین آن ودی مروک آ مشکل دُن تو پدریسہ ساڑی ءِ ولے پاکستانی حکومت نا انسانی زند و روزگار نا بابت پالیسی اہمیت تخک۔ پاکستان نا حکومت اسٹیٹ بینک انا وتواجہی، کارپوریٹ ٹیکسیشن، سرکاری کاروباری ادارہ غاتا انتظام و انصرام اٹی گچینی اتنگ، و بجلی تون اوار زرگزران نا چندی بشخ آتیٹی اصلاحات اٹی پیش رفت کریے۔ بیان اٹی پاننگانے کہ دین آن ودی مروک آ چیلنج و مشکل و ودکی فنڈ آسراتی نا بابت پاکستان نا حکومت نا عزم آن زرگزران ءِ سیبو تننگ، وام تا پائیداریت ءِ پک کننگ و ڈھانچہ جاتی اصلاحات نا نیام اٹ توازن ءِ قائم کننگ اٹ کمک رسینگانے۔
